Qazaqstan men Túrkııa arasyndaǵy jolaýshylar áýe tasymaly eki esege artady

NUR-SULTAN. QazAqparat - 13 mamyrdan bastap Qazaqstan men Túrkııa arasyndaǵy jolaýshylar áýe tasymaly eki esege artady, dep habarlaıdy QazAqparat QR IIDM baspasóz qyzmetine silteme jasap.

Memleket basshylary Qasym-Jomart Toqaev pen Rejep Taıyp Erdoǵannyń Ankarada ótken shaǵyn quramdaǵy kezdesýi kezinde QR Indýstrııa jáne ınfraqurylymdyq damý mınıstri Qaıyrbek Óskenbaev 13 mamyrdan bastap Qazaqstan men Túrkııa arasyndaǵy jolaýshylar áýe tasymaly eki esege artatynyn aıtty.
IIDM basshysy óz sózinde Qazaqstan men Túrkııa arasyndaǵy avıatsııa salasyndaǵy yntymaqtastyq artyp kele jatqandyǵyn baıandady. Búginde áýe qatynastary boıynsha Úkimetaralyq kelisim negizinde elder arasyndaǵy turaqty reısterdiń jıiligi boıynsha aptasyna 61 jolaýshylar reısi oryndalýda. Atap aıtqanda, osy merzim aralyǵynda otandyq Air Astana, Fly Arystan jáne SCAT áýe kompanııalary 37 reıs oryndasa, túrkııalyq Turkish Airlines jáne Pegasus kompanııalary 24 reıs júzege asyrýda. Jolaýshylar Stambul men Ankaraǵa jáne keri qaraı Nur-Sultan, Almaty, Aqtaý, Aqtóbe, Atyraý, Shymkent jáne Túrkistan qalalary arqyly usha alady.

Endi 13 mamyrdan bastap ushý sany aptasyna 63 reıske artpaq. Sáıkesinshe, elder arasyndaǵy apta saıynǵy reıs sany 124-ke deıin ósetin bolady.

«Bıylǵy jyldyń 13 mamyrynan bastap Antalııa jáne Bodrým baǵyttarynda qatynaıtyn Air Astana , SCAT, Turkish Airlines áýe kompanııalarynyń reıs sany birtindep artatyn bolady. Qosymsha reıster Nur-Sultan, Almaty, Aqtaý, Aqtóbe, Atyraý, Qaraǵandy, Qostanaı, Oral, Shymkent jáne Óskemen arqyly iske asyrylady», – dedi Qaıyrbek Óskenbaev.

Máselen, SCAT Antalııaǵa aptasyna 29 jańa reısti Nur-Sultan (aptasyna 7 reıs), Almaty (6), Aqtóbe (3), Atyraý (3), Shymkent (2), Qaraǵandy (2), Oral (2), Qostanaı (2), Aqtaý (1), Óskemen (1) qalalarynan júzege asyrady. Al Air Astana Nur-Sultan jáne Almatydan Antalııa (7 reısten) men Bodrýmǵa (2 reısten) aptasyna 18 reıs jasamaq.

Turkish Airlines Antalııaǵa aptasyna 16 reısti Nur-Sultan (5 reısten), Almaty (4) jáne Qaraǵandydan (3) jáne Bodrýmǵa Nur-Sultan (2 reısten) men Almatydan (2) oryndaıdy.

Qaıyrbek Óskenbaevtyń aıtýynsha, bıylǵy jyldyń mamyr aıynda Indýstrııa jáne ınfraqurylymdyq damý mınıstrligi memleketter arasyndaǵy áýe tasymalyn odan ármen arttyrý men ushý geografııasyn keńeıtý boıynsha eki eldiń áýe bıligi ókilderiniń kelissóz júrgizý usynǵan. Óz kezeginde bastama qoldaý taýyp, kelissózder aǵymdaǵy jyldyń shilde aıynda Stambul qalasynda ótedi.

Eske salaıyq, COVID-19 pandemııasyna deıin Qazaqstan men Túrkııa arasynda aptasyna 65 áýe tasymaly júzege asyrylǵan.