Qazaqstan men Túrkııa arasyndaǵy taýar aınalymy artty
«2018 jyly syrtqy saýda aınalymy 2 mlrd AQSh dollaryn qurady, al aǵymdaǵy jyldyń qańtar-mamyr aılarynda taýar aınalymy 1,3 mlrd AQSh dollaryn qurady. Osylaısha, biz eki el arasyndaǵy saýda qatynasynyń óskenin kórip otyrmyz, búgingi shara eki eldiń isker toptary arasyndaǵy saýda qarym-qatynasyn damytýǵa óz úlesin qosatynyna senimdimin»,-dep habarlady QR IIDM jaýapty hatshysy Mereke Pishembaev.
Onyń málimetinshe, Qazaqstan Túrkııaǵa aýyl sharýashylyǵy, et ónimderi, metall jáne metall buıymdaryn, hımııa ónerkásibi ónimderin, mashınalar men jabdyqtardy, dárilik zattar, azyq-túlik ónimderi jáne basqa asa perspektıvaly 47 taýar pozıtsııasy boıynsha taýar jetkizýge daıyn.
«Elderimiz arasynda ınvestıtsııalyq yntymaqtastyq belsendi túrde damýda. Sońǵy 14 jylda túrik ınvestorlarynyń Qazaqstan ekonomıkasyna quıǵan ınvestıtsııasy shamamen 3 mlrd AQSh dollaryna jetti. Túrik ekonomıkasyna quıylǵan qazaqstandyq ınvestıtsııa - 1 mlrd AQSh dollary. Elderimizdiń eksporttyq áleýetin barynsha paıdalana otyryp, bul oń úrdisti qoldaý qajet. Bul baǵytta yntymaqtastyqty damytý úshin bar jaǵdaı jasalǵan», - dep atap ótti Mereke Pishembaev.
Jaýapty hatshy qoıylǵan mindetterdi iske asyrý úshin barlyq qajetti bazasy, sondaı-aq ekijaqty yntymaqtastyqty nyǵaıtýdyń barlyq qajetti tetikteri qurylǵanyn atap ótti.
«Birinshiden, keń aýqymdy máseleler boıynsha ózara is-qımyldy nyǵaıtýdyń mańyzdy quraly - saýda-ekonomıkalyq yntymaqtastyq jónindegi qazaq-túrik úkimetaralyq komıssııasy. Ekinshiden, baýyrlas elder arasyndaǵy strategııalyq áriptestikti damytýǵa bizdiń memleket basshylarynyń qamqorlyǵymen júzege asyrylatyn «Jańa Sınergııa» baǵdarlamasyn iske asyrý erekshe serpin berdi», - dep atap ótti jaýapty hatshy.
Búgingi tańda Qazaqstanda 1300-den astam birlesken kásiporyn belsendi jumys isteýde.
«Sonymen qatar, biz Qazaqstannyń ınfraqurylymyn damytýdaǵy Túrkııanyń rólin joǵary baǵalaımyz. Túrik kompanııalary bizdiń elordamyzdyń qurylysyna belsendi qatysty, Han Shatyr, Ulttyq murajaı, jańa temirjol vokzaly sııaqty jalpy somasy 23 mlrd.AQSh dollaryn quraıtyn iri mańyzdy jobalardy iske asyrdy. Túrik kompanııalarynyń kómegimen Qazaqstanda 800 shaqyrymnan astam avtojol qaıta jańartylyp, 100 kılometr qaıta jańartylýda», - dedi Mereke Pishembaev.
Búgingi tańda túrik kompanııalarynyń qatysýymen 1,3 mlrd AQSh dollaryn quraıtyn Úlken Almaty aınalma kólik jolynyń qurylysy boıynsha iri ınfraqurylymdyq joba iske asyrylýda.
«Sonymen qatar, Túrkistan oblysynda ınfraqurylymdyq jobalardy júzege asyrý boıynsha YDA-Holding kompanııasynyń júrgizip otyrǵan jumysyn atap ótkim keledi. Úshinshiden, Qazaqstan aýmaǵy arqyly Túrkııaǵa júkterdi tıimdi tasymaldaý úshin barlyq qajetti ınfraqurylym quryldy. Baký-Tbılısı-Kars temir jol jelisin jeke iske qosý, sondaı-aq Transkaspıı halyqaralyq kólik marshrýtyn iske asyrý elder arasyndaǵy tasymaldardy jáne tranzıttik tasymaldardy edáýir arttyrýǵa múmkindik berdi. Bul qatynastardyń shegi emes dep esepteımin, bolashaqta QHR-Qazaqstan-Túrkııa baǵyty boıynsha tasymaldardy birneshe esege arttyra alamyz»,-dep qorytty mınıstrliktiń jaýapty hatshysy.