Qazaqstan men Túrkııa arasyndaǵy áskerı yntymaqtastyqtyń qadamdary aıqyndaldy
Kelisimge 2018 jylǵy qyrkúıekte Ankarada qol qoıyldy. Osy ýaqytqa deıin eki memleket arasyndaǵy áskerı saladaǵy yntymaqtastyq 1993 jylǵy 8 tamyzdaǵy áskerı bilim salasyndaǵy, sondaı-aq 1994 jylǵy 23 aqpandaǵy áskerı ǵylym, tehnıka jáne bilim salasyndaǵy yntymaqtastyq týraly kelisimder negizinde júzege asyrylyp keledi.
«Túrkııa Qazaqstannyń mańyzdy ári negizgi strategııalyq seriktesteriniń biri bolyp sanalady. Joǵaryda atalǵan halyqaralyq sharttardyń keıbir erejeleri eki memlekettiń qoldanystaǵy zańnamasyna sáıkes kelmeýi jáne olarda is-sharalardy ótkizý boıynsha qarjylyq shyǵystarmen qamtamasyz etý tártibiniń bolmaýyna baılanysty áskerı yntymaqtastyq salasynda jańa kelisim jasaý týraly sheshim qabyldanǵan bolatyn», - dedi QR Qorǵanys mınıstriniń orynbasary Tımýr Dándibaev.
Atap aıtqanda, qarastyrylyp otyrǵan kelisimniń maqsaty taraptar arasyndaǵy teń quqyqtyq pen ózara tıimdilik qaǵıdattar negizinde áskerı yntymaqtastyqty damytýǵa negizdelgen. Kelisim áskerı daıarlyq pen oqytýdy qosa alǵanda, budan buryn qamtylmaǵan birlesken oqý-jattyǵýlardy ótkizý, áýe keńistigi arqyly áskerı múliktiń tranzıti, medıtsınalyq kómek kórsetý, zań quzyrettiligi, sondaı-aq basqa da máselelerdi kózdeıdi.
«Osy kelisimdi iske asyrý boıynsha sharalar taraptarmen birlesip ázirlegen Jyldyq yntymaqtastyq josparyna sáıkes júzege asyrylatyn bolady. Kelisimdi iske asyrý Qazaqstannyń áskerı saladaǵy múmkindikterin keńeıtýdi qamtamasyz etedi jáne eki memleket arasyndaǵy áskerı yntymaqtastyqtyń damýyna oń áser etetin bolady», - dedi T. Dándibaev.
Talqylaýdan keıin komıtet músheleri atalǵan zań jobasyn Senattyń jalpy otyrysynyń qaraýyna engizý týraly sheshim qabyldandy.