Qazaqstan men Túrkııa arasynda kedendik baqylaý rásimderi jeńildeıdi

ASTANA. QazAqparat – Búgin Senattyń jalpy otyrysynda «Qazaqstan Úkimeti men Túrkııa Úkimeti arasyndaǵy aqparat almasýdy uıymdastyrý jáne kedendik baqylaý rásimderin ońaılatý týraly kelisimdi ratıfıkatsııalaý týraly» Zańy maquldandy, dep habarlaıdy QazAqparat tilshisi.

Kelisimge 2022 jylǵy 10 mamyrda Memleket basshysynyń Ankaradaǵy sapary aıasynda qol qoıyldy.

Túrkııa Qazaqstannyń negizgi saýda-ekonomıkalyq áriptesteriniń biri sanalady, ıaǵnı saýda qarym-qatynasynda Eýrazııalyq ekonomıkalyq odaqqa múshe memleketterdi esepke almaǵanda, 3-orynda tur. Kelisimdi ratıfıkatsııalaý eki memlekettiń arasynda ótkiziletin taýarlar men kólikter boıynsha málimetterdi elektrondyq almasý arqyly kedendik baqylaýdyń tıimdiligin arttyrýǵa jáne ony atqarý merzimderin qysqartýǵa baǵyttalǵan. Bul turǵyda kedendik baqylaý rásimderin ońaılatý jáne syrtqy ekonomıkalyq saýdada júrgender úshin neǵurlym qolaıly jaǵdaı jasaý eskerilgen

, - dedi senator Bekbolat Orynbekov.

Qaralyp otyrǵan zańnyń erejelerine sáıkes, ótkizý pýnkterinde shekaradan ótýdiń basym tártibi júzege asyrylady. Kedendik baqylaý ýaqytyn qysqartý maqsatynda tıisti qadaǵalaý is-sharalary jeńildetiledi. Sonymen qatar ótkizý pýnkterinde kedendik tekserý tártibi jeńildeıdi.

Buǵan qosa, beriletin málimetterdiń qaýipsizdigin qamtamasyz etý maqsatynda eki eldiń ýákiletti organdary aqparat almasýdyń tehnıkalyq sharttaryn jeke ázirleıdi. Tehnıkalyq sharttar ázirlenip, pılottyq jobany iske asyrý bastalady. Bul protsess aıaqtalǵannan keıin, eki eldiń keden organdary málimettermen turaqty negizde almasýdy qolǵa alady. Zań Qazaqstan men Túrkııa arasyndaǵy yntymaqtastyqtyń tıimdiligin arttyrýǵa baǵyttalǵan. Qujatty qabyldaý, teris quqyqtyq jáne áleýmettik-ekonomıkalyq saldarǵa ákep soqpaıdy. Kelisimdi iske asyrý maqsatynda memlekettik bıýdjetten qarjy shyǵyndaryn talap etpeıdi. Atalǵan qujat jan-jaqty talqylandy. Senattyń turaqty komıtetterinen eskertýler men usynystar túsken joq

, - dedi senator.