Qazaqstan men Túrkııa arasyndaǵy sporttyq yntymaqtastyq qarqyndy damyp keledi – mınıstr
ASTANA. KAZINFORM- Astana qalasynda ótip jatqan 5-shi Dúnıejúzilik kóshpendiler oıyndary aıasynda QR Týrızm jáne sport mınıstri Erbol Myrzabosynov Túrkııa Respýblıkasynyń Jastar jáne sport mınıstri Osman Ashkyn Bakpen kezdesti.
Kezdesý barysynda osy jyldyń basynan qazirgi ýaqytqa deıin Qazaqstan ulttyq quramasynyń sportshylary Túrkııada 16 jarysqa qatysyp, 30-dan astam oqý-jattyǵý jıynyn ótkizgeni belgili boldy.
«Qazaqstan men Túrkııa – tarıhtyń, tildiń, dinniń jáne mádenıettiń ortaqtyǵyna negizdelgen berik baılanystaǵy baýyrlas el. Qazaq-túrik qatynastary jyl saıyn damyp, nyǵaıyp keledi. Ásirese sport salasynda tyǵyz jáne dostyq qarym-qatynas qarqyndy damyp keledi», - dedi Týrızm jáne sport mınıstri Erbol Myrzabosynov.
Aıta keteıik, 5-shi Dúnıejúzilik kóshpendiler oıyndarynyń sporttyq baǵdarlamasyna túrik halqynyń mangala jáne ashyrtmaly aba gıýreshı sporty engen.
Elimizde ótip jatqan oıynǵa Túrkııa Respýblıkasynan 97 sportshy sporttyń 12 túri boıynsha qatysyp jatyr.
