Qazaqstan men Túrkııa arasyndaǵy yntymaqtastyq jańa kezeńge ótti — Djevdet Iylmaz
ASTANA. KAZINFORM — Qazaqstan men Túrkııa arasyndaǵy saýda-ekonomıkalyq yntymaqtastyq jańa kezeńge qadam basty. Bul týraly Túrkııa Respýblıkasynyń vıtse-prezıdenti Djevdet Iylmaz tilshilerge bergen suhbatynda málimdedi.
Onyń aıtýynsha, Qazaqstanǵa jasalǵan eki kúndik sapar mazmundy ári nátıjeli ótken. Túrik delegatsııasyn qazaqstandyq tarap joǵary deńgeıde qarsy alyp, issapar aıasynda iskerlik qaýymdastyq ókilderimen kezdesý uıymdastyrylǵan. Bul óz kezeginde ózara baılanystardy nyǵaıtyp, naqty jobalardy talqylaýǵa jol ashqan.
— Sapar óte qarqyndy ári nátıjeli ótti. Bizge kórsetilgen jyly qabyldaý men qurmet úshin alǵysymdy bildiremin. Іskerlik qaýymdastyqpen kezdesý de mazmundy boldy, - dedi vıtse-prezıdent.
Sonymen qatar ol Qazaqstannyń Premer-mınıstrimen ekijaqty kelissózder júrgizilgenin atap ótti. Osy kezdesýlerdiń jalǵasy retinde delegatsııalar deńgeıinde Úkimetaralyq ekonomıkalyq komıssııanyń 14-otyrysy ótip, onyń qorytyndysynda 67 tarmaqtan turatyn jańa is-qımyl josparyna qol qoıylǵan.
— Bul qujat eki el arasyndaǵy yntymaqtastyqty jańa kezeńge shyǵarady. Budan bólek, Qazaqstan Prezıdenti Qasym-Jomart Toqaevtyń qabyldaýynda bolyp, mazmundy ári nátıjeli kezdesý ótkizdik. Osy kelissózderdiń nátıjesi eki el úshin de ıgilikti bolady dep senemin, — dedi Djevdet Iylmaz.
Ol sondaı-aq sapardyń tabysty ótýine úles qosqan barlyq azamatqa, memlekettik qyzmetkerler men mınıstrlerge alǵys bildirdi. Vıtse-prezıdenttiń aıtýynsha, Qazaqstan men Túrkııa arasyndaǵy qarym-qatynas strategııalyq sıpatqa ıe jáne memleket basshylary aıqyndaǵan ortaq baǵytqa negizdelgen.
— Qazaqstan men Túrkııa — dostas, baýyrlas ári strategııalyq seriktester. Memleket basshylary — Rejep Taıyp Erdoǵan men Qasym-Jomart Toqaev aıqyndaǵan ortaq baǵdar bar. Biz osy baǵyttaǵy jumysty birlesip ári júıeli túrde júzege asyryp kelemiz, - dedi ol.
Aıta keteıik, búgin Túrkııa Vıtse-prezıdenti Jevdet Iylmaz ben Premer-mınıstr Oljas Bektenovtiń qatysýymen Saýda-ekonomıkalyq yntymaqtastyq jónindegi komıssııanyń 14-otyrysy ótti. Іs-shara barysynda Oljas Bektenov Qazaqstannyń Túrkııamen tyǵyz yntymaqtastyqqa daıyn baǵyttaryn atady.
