Qazaqstan men Túrkııa arasynda eshqandaı túıtkildi másele joq – Toqaev
ASTANA. KAZINFORM – Qazaq-túrik ekijaqty qarym-qatynasy keńeıtilgen strategııalyq seriktestik rýhynda qarqyndy damyp jatyr. Bul týraly Táýelsizdik saraıynda ótip jatqan Qazaqstan men Túrkııa arasyndaǵy Joǵary deńgeıdegi strategııalyq yntymaqtastyq keńesiniń 6-otyrysynda Memleket basshysy Qasym-Jomart Toqaev aıtty.
- Sizdi túbi bir túrki jurtynyń temirqazyǵy - Uly dala tórinde qarsy alý zor mártebe. Túrkııa biz úshin baýyrlas el, mańyzdy ári senimdi seriktes. Elderimizdiń tarıhy men rýhanı qundylyqtary ortaq. Tamyry tereń baılanystarymyz búginde halyqtarymyzdyń myzǵymas dostyǵyn odan ary nyǵaıtýǵa yqpal etip otyr. Qazirgi tańda qazaq-túrik ekijaqty qarym-qatynasy keńeıtilgen strategııalyq seriktestik rýhynda qarqyndy damyp jatyr. Elderimizdiń arasynda eshqandaı túıtkil joq. – dedi Qasym-Jomart Toqaev Túrkııa Prezıdenti Rejep Taııp Erdoǵanǵa qarata.
Prezıdenttiń aıtýynsha, memlektaralyq jáne úkimetaralyq baılanystar nyǵaıyp keledi. Parlamentaralyq yqpaldastyq ta joǵary deńgeıde. Túrik delegatsııasynyń quramynda bir top depýtattyń jáne partııa músheleriniń bolýy sonyń aıqyn dáleli.
- Sonymen qatar eki eldiń ekonomıkalyq yntymaqtastyǵy kúsheıe tústi. Túrkııa iri ınvetorlarymyzdyń qataryna kiredi. Osy ýaqytqa deıin Sizdiń elińizden ekonomıkamyzǵa 6 mlrd dollar ınvestıtsııa tartyldy. Qazaqstannyń Túrkııaǵa salǵan ınvestıtsııasy da ósip, 2,5 mlrd dollarǵa jýyqtady. Sondaı-aq túrik eli negizgi saýda seriktestigimizdiń biri. Qos halyqtyń mádenı-gýmanıtarlyq baılanystary qarym-qatynastarmyzdyń altyn arqaýy sanalady. Biz osy ıgi úrdisti saqtap, ózara yqpaldastyǵymyzdyń aıasyn keńeıte berýge múddelimiz, - dedi Memleket basshysy.
Buǵan deıin Memleket basshysy Qasym-Jomart Toqaev elimizge memlekettik saparmen kelgen Túrkııa Prezıdenti Rejep Taııp Erdoǵandy Táýelsizdik saraıynda resmı qarsy alǵan edi.
