Qazaqstan men Túrkııa arasynda áýe reısteri kóbeıedi
ASTANA. KAZINFORM — Túrkııa men Qazaqstan azamattyq avıatsııa salasyndaǵy yntymaqtastyqty damytýǵa jáne eki el arasyndaǵy áýe qatynasyn keńeıtýge baǵyttalǵan jańa ózara túsinistik týraly hattamaǵa qol qoıdy. Bul týraly Anadoly agenttigi jazdy.
Túrkııanyń Kólik jáne ınfraqurylym mınıstrligine qarasty Azamattyq avıatsııa bas basqarmasynyń (SHGM) málimetinshe, Stambulda Qazaqstannyń Azamattyq avıatsııa komıtetimen áýe qatynasyn damytý máseleleri boıynsha kelissózder ótti. Kezdesý qorytyndysynda Túrkııanyń Azamattyq avıatsııa bas basqarmasynyń bas dırektory Kemal Iúksek pen Qazaqstan Respýblıkasy Kólik mınıstrliginiń Azamattyq avıatsııa komıteti tóraǵasy Saltanat Tompıeva ózara túsinistik týraly hattamaǵa qol qoıdy.
Jańa erejelerge sáıkes, eki el arasyndaǵy jolaýshylar tasymaly boıynsha qoldanystaǵy quqyqtar keńeıtilip, áýe kompanııalaryna reısterdi ıkemdi josparlaýǵa múmkindik beriledi.
Atap aıtqanda, Stambuldan Qazaqstannyń iri qalalaryna, ásirese Astana men Almatyǵa qatynaıtyn reısterdiń tasymaldaý múmkindigi artty. Sondaı-aq Ankara, Antalıa jáne Bodrým arqyly eki eldiń basqa qalalary arasynda áýe qatynasyn damytýǵa jaǵdaı jasaldy.
Kelisim aıasynda eki eldiń áýe kompanııalaryna aptasyna 38 reıske deıin ózara turaqty júk reısterin oryndaýǵa múmkindik berildi. Bul Túrkııa men Qazaqstan arasyndaǵy saýda jáne logıstıkalyq baılanysty júk áýe tasymaly arqyly nyǵaıtýǵa yqpal etpek.
Jańa hattama áýe kompanııalaryna naryq jaǵdaıyna qaraı óz qyzmetin ıkemdi josparlaýǵa qosymsha múmkindik beredi. Jańartylǵan baǵyttar men áýe qatynasy quqyqtary eki el arasynda jańa marshrýttar ashýǵa jáne qoldanystaǵy baǵyttar boıynsha reıster sanyn arttyrýǵa quqyqtyq ári operatsııalyq negiz qalyptastyrady.
Sonymen qatar taraptar yntymaqtastyqty tek áýe tasymalymen shektemeı, avıatsııalyq qaýipsizdik, kadr daıarlaý, tehnıkalyq qyzmet kórsetý, jerústi qyzmetteri, áýejaılardy paıdalaný jáne tsıfrlandyrý baǵyttarynda da damytýǵa ýaǵdalasty.
Taraptardyń pikirinshe, jańa hattama Túrkııa men Qazaqstan arasyndaǵy avıatsııa salasyndaǵy dostyq ári ekonomıkalyq baılanystardy jańa deńgeıge kóterip, týrızm, saýda jáne ózara saparlardyń damýyna serpin beredi.
Aıta keteıik, Qytaı men Qazaqstan arasynda da reıster kóbeıdi. Endi Astanadan Beıjińge endi aptasyna 6 ret ushýǵa bolady.
