Qazaqstan men Túrkııa agrosalany JI tehnologııasy arqyly jańǵyrtpaq
ASTANA. KAZINFORM — Astanada agroónerkásiptik keshenge jasandy ıntellekt pen tsıfrlyq tehnologııalardy engizý taqyrybyna arnalǵan óńirlik tehnıkalyq semınar ótti, dep habarlaıdy QR AShM baspasóz qyzmeti.
Eki kúndik is-shara QR Aýyl sharýashylyǵy mınıstrligimen birlesip, Qazaqstandaǵy Tsıfrlandyrý jáne jasandy ıntellekt jyly aıasynda Islam azyq-túlik qaýipsizdigi uıymy (IAZQU) tarapynan uıymdastyryldy.
Semınarǵa Qazaqstan men Túrkııanyń jetekshi sarapshylary, ǵylymı jáne tehnologııalyq uıymdardyń ókilderi jınalyp, ózara tájirıbe almasyp, agroónerkásiptik keshendi tsıfrlandyrý salasynda ortaq sheshim qabyldaýǵa belsene qatysty.
Túrik mamandary AÓK monıtorıngi men basqarýyna arnalǵan keshendi AT-platformalaryn tanystyrdy. Sondaı-aq memlekettik qoldaý tetikteriniń ashyqtyǵyn arttyrýǵa jáne aýyl sharýashylyǵy jerlerin paıdalaný tıimdiligin baqylaýǵa baǵyttalǵan jasandy ıntellektti qoldaný mysaldaryn kórsetti.
Qazaqstan Respýblıkasy Aýyl sharýashylyǵy mınıstrliginiń ókilderi agroónerkásiptik salany tsıfrlandyrý boıynsha júzege asyrylyp jatqan sharalar men negizgi aqparattyq júıeler týraly málimet berdi.
Otyrysta «Qazaqstan Ǵarysh Sapary» UK» AQ jer monıtorıngi men dálme-dál kartografııalaý quraldarynyń múmkindikterin tanystyrdy. Astana IT University men Aqyldy júıeler jáne jasandy ıntellekt ınstıtýtynyń (ISSAI) ókilderi aýyl sharýashylyǵyna arnalǵan mashınalyq oqytýǵa negizdelgen qoldanbaly sheshimderdi usyndy.
Semınar qorytyndysynda agroónerkásiptik keshenge jasandy ıntellekt engizýdiń basym stsenarııler matrıtsasy jasaldy.
— Sonymen qatar, kezdesý ıeleri Túrkııa eline jaýapty tehnıkalyq sapar uıymdastyrýǵa kelisti. Onda qazaqstandyq mamandar tsıfrlyq platformalardyń jumysymen tanysyp, ozyq tájirıbelerdi otandyq naryqqa beıimdeý múmkindigine ıe bolmaq, — delingen habarlamada.
Buǵan deıin Túrkııa mektep qaýipsizdigi úshin jasandy ıntellekt júıesin engizgenin jazdyq.
