Qazaqstan men Túrki memleketteri biryńǵaı tsıfrlyq ekojúıeni damytýǵa nıetti

ASTANA. QazAqparat – IT-salany damytý, túrki áleminiń birligin nyǵaıtý boıynsha jańa tsıfrlyq bastamalardy engizý máseleleri, IT-qoǵamdastyq aldynda turǵan artyqshylyqtar men syn-qaterler Túrki memleketteri uıymynyń (TMU) hatshylyǵymen jáne TMU-ǵa qatysýshy elderdiń tsıfrlyq mınıstrlikterimen ótken paneldik sessııada talqylandy, dep habarlaıdy QazAqparat.

Paneldik sessııa jyl saıynǵy Digital Bridge – «Central Eurasia as a new tech platform» - «Ortalyq Eýrazııa jańa tehnologııalyq platforma retinde» halyqaralyq tehnologııalyq forýmy sheńberinde ótkizildi.

Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın ozyq tájirıbemen almasý jáne tsıfrlandyrý salasynda serpindi jobalardy qurý úshin tehnologııalyq kompanııalardyń seriktestik qatynastaryna járdem kórsetý arqyly túrki elderiniń ózara tıimdi jáne uzaq merzimdi yntymaqtastyǵyn ornatý qajettigin aıtty.

«Biz, árıne, aqparattyq qaýipsizdiktiń jáne memleketter qorǵaıtyn derekterdi taratpaýdyń barlyq talabyn eskere otyryp, aqparattyq júıelerdiń memleketaralyq ıntegratsııasy týraly salmaqpen oılanýymyz qajet. Bizdiń túpki maqsatymyz azamattarymyzdyń, bıznes pen memlekettik organdardyń ózara is-qımylyn neǵurlym qarapaıym jáne adamdarǵa baǵdarlanǵan etý bolýy tıis», - dedi Baǵdat Mýsın.

Óz kezeginde TMU bas hatshysy Baǵdad Ámireev TMU-nyń saýda men ınvestıtsııalardan bastap, keden jáne kólik sektorlarynda bıznes-qoǵamdastyqtar úshin kópjaqty elektrondyq saýda platformasyn qurýǵa deıingi barlyq áleýetti salalarda tsıfrlyq transformatsııany ilgeriletýde úlken áleýet baryna senim bildirdi.

Іs-shara barysynda TMU-ǵa qatysýshy elderdiń tsıfrlyq mınıstrlikteriniń basshylary ózara bastamalardy iske asyrýǵa ázir ekendikterin bildirdi.

Paneldik sessııa barysynda QR Tsıfrlyq damý, ınnovatsııalar jáne aeroǵarysh ónerkásibi mınıstrligi men TMU hatshylyǵy arasyndaǵy túrki elderinde IT-salany damytý salasyndaǵy nıetter týraly birlesken málimdemege qol qoıyldy.

Sharaǵa sondaı-aq TMU bas hatshysynyń orynbasary M. Azımov, Túrkııa Respýblıkasynyń Indýstrııa jáne tehnologııalar mınıstri M. Varank, Ózbekstan Respýblıkasynyń Aqparattyq tehnologııalar jáne kommýnıkatsııalardy damytý mınıstri Sh. Shermatov, Ázerbaıjan Respýblıkasynyń Tsıfrlyq damý jáne kólik vıtse-mınıstri F. Ahmedov, ІT-tehnoparkter men tehnologııalyq kompanııalardyń ókilderi qatysty.