Qazaqstan men Túrki memleketteri uıymy sport jáne týrızm salasyndaǵy yntymaqtastyqty nyǵaıtady

ASTANA. KAZINFORM – Týrızm jáne sport mınıstri Erbol Myrzabosynov Túrki memleketteri uıymynyń Bas hatshysy Kýbanychbek Ómirálıevpen kezdesti.

Atalǵan vedmstvonyń baspasóz qyzmeti atap ótkendeı, kezdesý barysynda taraptar Túrki memleketteri uıymyna múshe elder arasyndaǵy týrızm jáne sport salasyndaǵy yntymaqtastyqtyń ózekti máselelerin talqylady. Qazaqstan osy uıymnyń belsendi qatysýshysy retinde baýyrlastyq qarym-qatynastardy nyǵaıtýǵa jáne túrki álemin biriktirýge baǵyttalǵan bastamalardy qoldaıdy.

Erbol Myrzabosynov Túrki memleketteri uıymy elderi arasynda etnosport boıynsha turaqty chempıonattar men týrnırler ótkizýdi usyndy. Bul is-sharalar sport baılanystaryn nyǵaıtýǵa jáne túrki halyqtarynyń mádenı dástúrlerin saqtaýǵa kómektesedi.

«Búgin túrki dúnıesi úshin aýqymdy ári mańyzdy sporttyq is-shara – 5-shi Dúnıejúzilik kóshpendiler oıyndary bastalady. Qazaqstan Dúnıejúzilik kóshpendiler oıyndaryn túrki halyqtarynyń biregeı mádenı murasyn saqtaýǵa jáne nasıhattaýǵa baǵyttalǵan asa mańyzdy oqıǵa retinde qarastyrady. Oıyndar sporttyq dástúrlerdi ilgeriletip qana qoımaı, halyqtar arasyndaǵy etnıkalyq baılanystardy nyǵaıta túsetinine senimdimiz», - dedi mınıstr.

Oıyndarǵa álemniń 89 elinen kelgen 2700-ge jýyq sportshy men resmı tulǵa qatysady. Básekeler 21 sport túrinen ótip, 97 medal jıyntyǵy sarapqa salynady.