Qazaqstan men Túrikmenstan shekarasyndaǵy rejımge qatysty qajet normalar qabyldandy - depýtat

ASTANA. QazAqparat – Búgin QR Parlamentindegi Jibek Joly telearnasynyń mobıldi stýdııasynda Májilis depýtaty Maksım Rojın palata otyrysynda qabyldanǵan Qazaqstan-Túrikmenstan memlekettik shekarasynyń rejımi týraly zańy boıynsha pikir bildirdi, dep habarlaıdy QazAqparat tilshisi.

Aıta keteıik, búgin Májilistiń jalpy otyrysynda «Qazaqstan Respýblıkasynyń Úkimeti men Túrikmenstan Úkimeti arasyndaǵy Qazaqstan-Túrikmenstan memlekettik shekarasynyń rejımi týraly kelisimdi ratıfıkatsııalaý týraly» Zań qabyldady.

Kelisimniń basty maqsaty – quqyqtyq negizdi belgileý jáne memlekettik shekarada Qazaqstan Respýblıkasy men Túrikmenstan arasyndaǵy qarym-qatynasty retteý.

«Eki eldiń úkimetteri arasynda Qazaqstan-Túrikmenstan memlekettik shekarasynyń rejımi týraly kelisimge 2021 jylǵy 25 qazanda qol qoıylǵan edi. Zańnama boıynsha mundaı kelisimder ratıfıkatsııadan ótýi kerek. Qujat Parlament qaraýyna byltyr shildede engizilgen edi. Jalpy, shekarany belgileý jáne onyń demarkatsııasynan keıin shekaradaǵy tıisti tártipti ornatý eskerilgen. Búgin jalpy otyrysta depýtattar eki el shekarasynan adamdardyń ótýi problemalaryn kóterdi. Bul turǵyda jol máselesi, ótkizý beketterindegi jaǵdaı jáne basqa da nazar aýdaratyn taqyryptar bar. Osy zań atalǵan máselelerdi retteıdi», - dedi M. Rojın.

Onyń aıtýynsha, qujat aıasynda shekaradan azamattardyń, júk kólikteriniń ótýine tıisti jaǵdaı jasaý úshin qajet normalar eskerilgen.

«Bul turǵyda eki el haqynyń qarym-qatynasyna oń áser etetin bolady, sondaı-aq shekarashylardyń qarym-qatynasyn retteıdi», - dedi depýtat.

Sonymen qatar Maksım Rojın QR Parlamentinde Jibek Joly telearnasynyń mobıldi stýdııasynyń ashylýy durys bastama ekenin aıtty.

«Osy oraıda Parlamenttegi jumysty halyqqa túsinikti jetkizýdiń jaqsy amaly», - dedi depýtat.

Aıta keteıik, Jibek Joly telearnasynyń mobıldi stýdııasy apta saıyn QR Parlamenti Májilisiniń jalpy otyrysyn tikeleı efırde kórsetýge múmkindik beredi. Interaktıvti resýrs qazaqstandyqtardyń áleýmettik ómirine áser etetin máseleler men qoǵam talaptaryn talqylaý boıynsha, zań shyǵarý protsesine qatysty málimet taratady. Tikeleı efır kún tártibindegi ózekti máselelerdi qamtyp, Jibek Joly jýrnalısterine depýtattyq korpýstyń jumysyna qatysty senimdi aqparatty telekórermenge live formatynda jedel jetkizýge jol ashady.

Buǵan deıin atalǵan stýdııada Májilis depýtaty Edil Jańbyrshın palata otyrysynda qabyldanǵan zań talaptaryn túsindirdi.