Qazaqstan men Togo prezıdentteri keńeıtilgen quramda kelissóz júrgizdi
Qasym-Jomart Toqaev pen For Essozımna Gnassıngbe eki memlekettiń resmı delegatsııalarynyń qatysýymen keńeıtilgen quramda kelissóz júrgizdi. Kazinform bul týraly Aqordaǵa silteme jasap habarlaıdy.
Qazaqstan Prezıdenti Togo delegatsııasyna iltıpat bildire otyryp, dostas eki el arasyndaǵy dıplomatııalyq qatynastardyń 10 jyldyǵy qarsańynda Astanada ótip jatqan bul sapardyń sımvoldyq máni bar ekenin atap ótti.
«Búgingi kelissózder ekijaqty baılanystardyń jańa kezeńin aıqyndap, ózara tıimdi yntymaqtastyǵymyzdyń perspektıvti baǵyttaryn zerdeleýge zor múmkindik beredi. Biz Togomen aradaǵy yqpaldastyqty nyǵaıtýǵa múddelimiz jáne sizdiń elińizdi Afrıkadaǵy mańyzdy seriktes retinde qarastyramyz», – dedi Memleket basshysy.
Prezıdent eki eldiń bir-birinen alys jatqanyna qaramastan, ortaq tustary kóp ekenine, atap aıtqanda, kópkonfessııaly jáne kópetnosty quramymen erekshelenetinine toqtaldy.
«Qazaqstanda 100-den astam etnos ókilderi turady. Konfessııaaralyq jáne dinaralyq dıalogty damytý – bizdiń memlekettik saıasatymyzdyń basym baǵyttarynyń biri», – dedi Qasym-Jomart Toqaev.
Memleket basshysynyń pikirinshe, Qazaqstan men Togo arasyndaǵy seriktestiktiń áleýeti áli tolyq paıdalanylmaı otyr. Ony damytý úshin ekijaqty qujattarǵa, sonyń ishinde ınvestıtsııalardy ózara qorǵaý týraly kelisimge qol qoıý qajet.
Qazaqstan Prezıdenti ekijaqty saýda-sattyqty órkendetý jáne isker toptar arasyndaǵy baılanysty nyǵaıtý mańyzdy ekenine toqtalyp, Qazaqstannyń Togodaǵy Qurmetti konsýly laýazymyna laıyqty kandıdatty anyqtaýdy usyndy. Memleket basshysy mundaı qadam eki el arasynda B2B formatyndaǵy baılanystardy damytýǵa septigin tıgizedi dep esepteıdi.
«Búkil álemdegi halyqaralyq yntymaqtastyqty nyǵaıtýǵa atsalysý isinde Qazaqstan men Togo sııaqty memleketter meılinshe belsendi jáne konstrýktıvti ról atqara alady dep sanaımyn», – dedi Memleket basshysy.
Memleket basshysy Qasym-Jomart Toqaevtyń shaqyrýymen 27-28 qarashada Togo Respýblıkasynyń Prezıdenti For Essozımna Gnassıngbe Qazaqstanǵa resmı saparmen keletinin buǵan deıin jazǵan bolatynbyz. Búgin QR Prezıdenti Aqordada For Essozımna Gnassıngbeni saltanatty túrde qarsy aldy. Keıin qos el basshylary shaǵyn quramda kelissóz ótkizdi.
Qazaqstan Prezıdentiniń keńesshisi – Baspasóz hatshysy Berik Ýálıuly bul sapardyń máni men mańyzy týraly aıtty.
Kazinform tilshisi Togo Respýblıkasynyń tarıhyna, prezıdentine qatysty ǵalamtordaǵy derekterge kóz júgirtken edi.
