Qazaqstan men TMD elderi azamattarynyń jeke derekterin taratqan halyqaralyq arna joıyldy - ІІM
ASTANA. KAZINFORM-Qazaqstan Respýblıkasy Іshki ister mınıstrligi Ulttyq qaýipsizdik komıtetimen jáne qadaǵalaý organymen, sondaı-aq Chehııa Respýblıkasynyń polıtsııasymen birlesip júrgizgen aýqymdy arnaıy operatsııanyń nátıjesinde Qazaqstan men TMD elderiniń azamattarynyń jeke derekterin zańsyz taratýmen aınalysqan halyqaralyq arnany joıdy, - dep habarlaıdy Polisia.kz.
- Jedel-izdestirý jumystary, muqııat josparlaý jáne quqyq qorǵaý organdarynyń úılestirilgen is-qımyldarynyń nátıjesinde halyqaralyq deńgeıde áreket etken qylmystyq toptyń qyzmeti áshkerelenip, joly kesildi. Sonymen qatar qylmystyq is boıynsha kúdiktilerdiń turǵylyqty jeri boıynsha, ıaǵnı Chehııa Respýblıkasynyń Ýstı-nad-Labem qalasynda, sondaı-aq Astana, Almaty jáne Qaraǵandy qalalarynda tintý jumystary júrgizildi. Tergeý áreketteri barysynda zańsyz qyzmettiń dálelderi bolyp tabylatyn kóptegen tsıfrlyq aqparat tasymaldaǵyshtar, sondaı-aq qolma-qol aqsha tárkilendi, - dedi ІІM kıberqylmysqa qarsy is-qımyl departamentiniń bastyǵy Jandos Súıinbaı.
ІІM málimetinshe, qylmystyq áreketterdi júzege asyrý úshin kúdiktiler Qazaqstan men kórshiles memleketterdiń azamattaryna qatysty jeke derekter ornalastyrylǵan jabyq ınternet-resýrs qurǵan. Top ishinde naqty ıerarhııalyq qurylym bolǵan: árbir qatysýshy ózine júktelgen mindetti atqarǵan. Olar qylmystyq shemany úılestirýshilerden bastap, jeke derekterdi zańsyz anyqtaýǵa qatysty tapsyrystardy qabyldap, óńdeıtin operatorlarǵa deıingi qyzmetterdi oryndaǵan. Zańsyz jolmen alynǵan qarajatty qolma-qol aqshaǵa aınaldyrý úshin drop-akkaýnttar paıdalanylǵan.
- Ártúrli zańsyz qyzmet túrlerine, onyń ishinde bir rettik suranystar men resýrsqa abonenttik qoljetimdilikke arnalǵan arnaıy baǵa tizimi belgilengen. Qylmystyq shemany uıymdastyrdy degen kúdikke ilingen adamdar ustalyp, ýaqytsha ustaý ızolıatoryna qamaldy. Tergeý júrip jatyr. Qazaqstan Respýblıkasy Іshki ister mınıstrligi kıberqylmysqa qarsy is-qımyldy, jeke derekterdi zańsyz taratýdyń arnalary men kózderin anyqtap, joıýdy, sondaı-aq azamattardyń quqyqtary men qaýipsizdigin qorǵaý baǵytyndaǵy keshendi sharalardy odan ári jalǵastyrady, - dedi ІІM kıberqylmysqa qarsy is-qımyl departamentiniń bastyǵy Jandos Súıinbaı.
Aıta keteıik, osyǵan deıin Bas prokýratýra kıberalaıaqtyqty ashý kórsetkishi 29%-ǵa óskeni týraly habarlady.
