Qazaqstan men Tájikstannyń júk tranzıti 7 mln tonnaǵa jetti — Prezıdent
ASTANA. KAZINFORM — Qazaqstan men Tájikstan arasyndaǵy avto jáne temirjol arqyly júk tranzıtiniń kólemi byltyr 7 mıllıon tonnaǵa jýyqtady. Eki el tasymal kólemin arttyryp, kólik-logıstıka baǵyttaryn damytady jáne sý resýrstaryn basqarýǵa tsıfrlyq tehnologııalardy engizý jumysyn jalǵastyrady. Bul týraly Memleket basshysy Qasym-Jomart Toqaev málimdedi.
Prezıdent Qasym-Jomart Toqaev kólik-tranzıt salasyndaǵy seriktestikti jandandyrýdyń mańyzyna toqtaldy.
— Byltyr elderimiz arasyndaǵy avto jáne temirjolmen júk tranzıti kólemi sáıkesinshe 8 jáne 15 paıyzǵa ulǵaıyp, shamamen 7 mıllıon tonnany qurady. Tasymaldaýshylarǵa jasalǵan jaǵdaı bıyl da oń dınamıkany saqtaýǵa múmkindik berdi. Kólikti tsıfrlandyrý máselesine basa nazar aýdarý jóninde ýaǵdalastyq. Bul júkti irkilissiz jetkizýdi qamtamasyz etedi. Atalǵan baǵytty odan ári damytý úshin basty kólik-logıstıka jobalaryn iske asyrý perspektıvasy pysyqtalady. Ulttyq temirjol kompanııalary deńgeıindegi jumys tobyna yntymaqtastyq boıynsha naqty usynystar engizý tapsyryldy, — dedi Memleket basshysy Aqordada BAQ ókilderine arnalǵan brıfıngte.
Budan bólek, Qasym-Jomart Toqaev kelissóz barysynda sý-energetıka salasyna aıryqsha mán berilgenin jetkizdi.
— Qazaqstan transshekaralyq ózender qoryn paıdalaný máselesine qatysty birizdi saıasaty men qoldaýy úshin tájik tarapyna alǵys aıtady. Biz osy baǵyttaǵy konstrýktıvti yqpaldastyqty jalǵastyrýǵa kelistik. Sý salasyna tsıfrlyq sheshimderdi engizý, sý resýrstaryn esepke alý jáne monıtorıng júıesin birlese damytý — basym mindet, — dedi Prezıdent.
Memleket basshysy atap ótkendeı, eki eldiń IT-sektordaǵy yntymaqtastyǵy mol múmkindikke jol ashady.
— Keıingi jyldary elimiz memlekettik qyzmetterdi tsıfrlandyrý jáne jasandy ıntellekt tehnologııasyn damytý isinde edáýir tabysqa qol jetkizdi. Buǵan deıingi ýaǵdalastyqtar aıasynda tájik tarapyna elektrondyq úkimet platformasynyń tsıfrlyq sheshimderi berildi. Tájikstandyq mamandar Qazaqstannyń úzdik IT-mektepterindegi taǵylymdama kýrstaryn oıdaǵydaı aıaqtady. M. Osımı atyndaǵy Tájik tehnıkalyq ýnıversıteti janynan L. Gýmılev atyndaǵy Eýrazııa ulttyq ýnıversıtetiniń qatysýymen birlesken aqparattyq tehnologııalar fakýlteti ashyldy. Osy ispetti jobalar elderimizdiń tehnologııalyq turǵydan órleýine septigin tıgizetinine senimdimin. Barlyq baǵyttaǵy aýqymdy jumysty júıeleý úshin Qazaqstan men Tájikstan arasyndaǵy yntymaqtastyqtyń 2030 jylǵa deıingi keshendi josparyn ázirlep, qabyldaýdy usyndyq, — dedi Qasym-Jomart Toqaev.
Aıta keteıik, Aqordada Qazaqstan men Tájikstannyń resmı delegatsııalary úkimetaralyq jáne vedomstvoaralyq deńgeıde 14 qujatqa qol qoıdy.
5-7 qarasha kúnderi Memleket basshysynyń shaqyrýymen elimizge Tájikstan Prezıdenti Emomalı Rahmonnyń resmı sapary ótip jatyr.
Sondaı-aq Qazaqstan Tájikstannyń eń iri saýda seriktesteriniń úshtigine endi.
