Qazaqstan men Tájikstan taýar aınalymyn ulǵaıtý jónindegi jol kartasyn qabyldady
ASTANA. KAZINFORM — Qazaqstan men Tájikstan 2030 jylǵa deıin taýar aınalymyn ulǵaıtý jónindegi jol kartasyn qabyldady. Eki el úkimetterine atalǵan mindetti sapaly oryndaý júkteldi.
Prezıdent Qasym-Jomart Toqaevtyń aıtýynsha, búgingi kelissózder jemisti ótip, qos tarap san qyrly yntymaqtastyqty odan ári nyǵaıtýǵa nıetti ekenin málimdedi.
— Biz senim men ózara qurmet sıpatynda órbigen áńgime barysynda kóptegen máseleni talqylap, memleketaralyq yqpaldastyqtyń negizgi basymdyqtaryn aıqyndadyq. Eń aldymen, saýda-ekonomıkalyq baılanystardy keńeıtýge mán berildi. Birlesken kúsh-jigerdiń arqasynda ekijaqty taýar aınalymy 2 mıllıard dollarlyq mejege taıap qaldy. Nátıjesinde Qazaqstan Tájikstannyń syrtqy saýda seriktesteriniń úshtigine enedi. Qadirli Emomalı Sharıpovıchpen ózara alys-beristi jandandyratyn qajetti sharalar qabyldaýǵa kelistik. Búgin osy maqsatqa jetýdi kózdeıtin 2030 jylǵa deıin taýar aınalymyn ulǵaıtý jónindegi jol kartasy qabyldandy. Eki el úkimetterine atalǵan mindetti sapaly oryndaý júkteldi, — dedi Qasym-Jomart Toqaev.
Prezıdenttiń pikirinshe, agrarlyq sektorda múmkindik mol. Byltyr eki el arasyndaǵy aýyl sharýashylyǵy ónimderiniń jetkizilimi 11 paıyzǵa ósip, shamamen 600 mıllıon dollardy quraǵan. Bul — tutas taýar aınalymynyń teń jartysy.
Kelissóz qorytyndysy boıynsha memleketterdiń bir-birine jetkizetin azyq-túlik taýarlarynyń kólemin ulǵaıtýǵa daıyn ekeni aıtyldy. Bul saladaǵy yntymaqtastyqty ilgeriletý úshin aýyl sharýashylyǵy ónimin óńdeıtin tolyqqandy óndiris tizbegin qurý múmkindigi talqylandy.
Memleket basshysy ekonomıkalyq ósimge tyń serpin beretin birlesken jobalardy iske asyrýdy mańyzdy mindet retinde atady.
Qasym-Jomart Toqaev energetıka, munaı-gaz, taý-ken metallýrgııasy, óńdeý ónerkásibi sektorlaryndaǵy ózara tıimdi seriktestiktiń keleshegi zor dep sanaıdy.
Bul rette sapar qarsańynda ótken Qazaq-tájik bıznes forýmy eki el kásipkerleriniń kóptegen baǵytta baılanysty jolǵa qoıýǵa múddeli ekenin rastady.
Aıta keteıik, Aqordada Qazaqstan men Tájikstannyń resmı delegatsııalary úkimetaralyq jáne vedomstvoaralyq deńgeıde 14 qujatqa qol qoıdy.
5-7 qarasha kúnderi Memleket basshysynyń shaqyrýymen elimizge Tájikstan Prezıdenti Emomalı Rahmonnyń resmı sapary ótip jatyr.
Sondaı-aq Qazaqstan Tájikstannyń eń iri saýda seriktesteriniń úshtigine endi.
