Qazaqstan men Tájikstan taýar aınalymyn 2 mlrd dollarǵa arttyrmaq
ASTANA. KAZINFORM — Qazaqstannyń Tájikstandaǵy Elshisi Ýálıhan Tórehanovtyń Tájikstannyń Saýda-ónerkásip palatasynyń tóraǵasy Farhodshoh Rahmonalızodamen kezdesýi ótti. Bul týraly SІM baspasóz qyzmeti málim etti.
Kezdesý barysynda taraptar ekonomıka, saýda jáne ınvestıtsııa salasyndaǵy ekijaqty yntymaqtastyqty keńeıtý máselelerin talqylady, sondaı-aq eki eldiń iskerlik mıssııalaryn uıymdastyrý, halyqaralyq kórmelerge belsendi qatysý jáne isker toptar arasyndaǵy tikeleı baılanystardy nyǵaıtý máseleleri boıynsha pikir almasty.
— 2025 jyly Qazaqstan men Tájikstan arasyndaǵy taýar aınalymy 1,19 mlrd AQSh dollaryn quraǵany atap ótildi. Taraptar eki eldiń tıisti qurylymdary men bıznes-qoǵamdastyqtarynyń birlesken kúsh-jigerimen eki el arasyndaǵy saýda-ekonomıkalyq yntymaqtastyqty 2 mlrd AQSh dollaryna deıin ulǵaıtý áleýetiniń keń perspektıvalary bar ekenin aıtty, — delingen habarlamada.
Eki eldiń bıznes-toptary arasyndaǵy turaqty dıalogty qoldaý maqsatynda Qazaqstan-Tájikstan Іskerlik keńesiniń kezekti otyrysyn ótkizý máselesi qozǵaldy. Óz kezeginde F.Rahmonalızoda 2026 jyly Tájikstanda josparlanǵan halyqaralyq kórmeler men forýmdarǵa qatysýǵa shaqyrdy.
Kezdesý sońynda taraptar saýda-ekonomıkalyq saladaǵy qazaq-tájik baılanystaryn nyǵaıtý isinde jemisti yntymaqtastyqqa daıyn ekendigin bildirdi.
Eske sala keteıik, buǵan deıin Qazaqstan men Tájikstan arasyndaǵy odaqtastyq qatynastar týraly shart ratıfıkatsııalanǵanyn jazǵan edik.
