Qazaqstan men Tájikstan parlamentteri yntymaqtastyqty tereńdetý jaıyn talqylady
ASTANA. KAZINFORM — Qazaqstan Respýblıkasy Májilisiniń tóraǵasy Erlan Qoshanov Tájikstan Respýblıkasy Madjlısı Olı Madjlısı mıllı tóraǵasy Rýstamı Emomalımen kezdesti, dep habarlaıdy Májilistiń baspasóz qyzmeti.
Tájikstan Parlamentiniń joǵarǵy palatasynyń basshysy Astanaǵa resmı saparmen keldi.
Parlament delegatsııasyn qarsy alǵan Erlan Qoshanov áriptesterin Parlamenttiń qos palatasy depýtattary saılaýynyń sátti ótýimen jáne jeke Rýstamı Emomalıdi Tájikstan Madjlısı Olı Madjlısı mıllı tóraǵasy bolyp qaıta saılanýymen quttyqtady.
— Bizdiń elderimizdi ǵasyrlar boıy qalyptasqan baýyrlastyq, dostyq jáne yntymaqtastyq baılanystyrady. Qazaqstan Prezıdenti Qasym-Jomart Toqaev pen Tájikstan Prezıdenti Emomalı Rahmonnyń turaqty kezdesýleri ekijaqty yntymaqtastyqtyń damýyna erekshe serpin berip otyr. Búginde bizdiń qarym-qatynasymyz eń joǵary — odaqtastyq deńgeıine kóterilýde. Osy oraıda kóshbasshylarymyz qol jetkizgen barlyq kelisimniń júzege asýy jáne halyqtarymyz arasyndaǵy dostyqtyń nyǵaıýy úshin bizdiń parlamentterge berik zańnamalyq negiz qalyptastyrý mindeti júktelip otyr, — dedi Májilis tóraǵasy.
Taraptar parlamentaralyq baılanysty odan ári damytý men nyǵaıtý bolashaǵyn talqylady. Spıkerler kópjaqty alańdardaǵy yqpaldastyq pen dostyq toptary aıasyndaǵy ózara is-áreketke aıryqsha nazar aýdaryp otyr. Sondaı-aq depýtattar zań shyǵarý salasynda tájirıbe almasýdy tereńdetýge qatysty birqatar máseleni ortaǵa saldy.
Áńgime barysynda tsıfrlyq ınnovatsııalardy damytýǵa da basa kóńil bólindi. Erlan Qoshanov Májilis depýtattary osy baǵytta tájirıbesi bólisýge daıyn ekenin aıtty. Osy rette Qazaqstan BUU-nyń Elektrondy úkimetti damytý ındeksi boıynsha (24-oryn) aldyńǵy qatarly memleketter qataryna ekenin atap ótti. Búginde elimizde memlekettik qyzmetterdiń 90 paıyzdan astamy onlaın kórsetiledi. Al Májiliste «Jasandy ıntellekt týraly» zań jobasy men Tsıfrlyq kodeks boıynsha belsendi jumys júrgizilip jatyr.
Tájikstan Parlamentiniń depýtattary Qazaqstandaǵy áleýmettik saladaǵy reformalarǵa da qyzyǵýshylyq tanytty. Májilis spıkeri 2019 jyly qabyldanǵan «Pedagog mártebesi týraly» zań muǵalimderdiń áleýmettik jaǵdaıyn edáýir jaqsartýǵa múmkindik bergenin, sondaı-aq pedagogterdiń qoǵamdaǵy bedelin arttyrýǵa qatysty Memleket basshysy alǵa qoıǵan mindetterdiń ári qaraı júzege asyrylyp jatqanyn aıtty.
Óz kezeginde Rýstamı Emomalı qazaqstandyq tarapqa qonaqjaılyq tanytqany úshin alǵysyn bildirip, qazirgi ýaqyttaǵy parlamentaralyq yntymaqtastyqtyń róli erekshe ekenin atap ótti.
— Qazaqstanmen ekijaqty qatynastardy damytý — Tájikstannyń syrtqy saıasatyndaǵy basymdyqtyń biri. Bul ózara túsinistik, qurmet, senim jáne jasampaz áriptestikke umtylý sııaqty kóne dástúrlerge negizdelgen. Sonymen qatar Qazaqstan men Tájikstan parlamentteri arasyndaǵy baılanystar tıimdi parlamentaralyq is-árekettiń úlgisi deýge bolady. Osy oraıda bizdiń parlamentaralyq yqpaldastyǵymyzdyń jyl saıyn keńeıip kele jatqany qýantady, — dedi Madjlısı Olı Madjlısı mıllı tóraǵasy.
Rýstamı Emomalı sondaı-aq saýda-ekonomıka baǵytyndaǵy ózara is-áreket, ınvestıtsııalyq qyzmet, ınnovatsııalar, aýyl sharýashylyǵy jáne mádenıet sııaqty salalarda eki el arasyndaǵy yntymaqtastyqty arttyrýdyń múmkindigi zor ekenin atap ótti.
Kezdesýdi qorytyndylaı kele, taraptar bul resmı sapar eki el men halyqtarymyz arasyndaǵy qarym-qatynasty nyǵaıtýdyń taǵy bir naqty qadamyna aınalatynyna senim bildirdi.
Osyǵan deıin Erlan Qoshanov Ózbekstannyń Olıı Májilis Senatynyń tóraǵasymen kezdesken edi.