Qazaqstan men Tájikstan yntymaqtastyǵy barlyq salada qarqyndy ilgerilep keledi — Emomalı Rahmon
ASTANA. KAZINFORM — Tájikstan Prezıdenti Emomalı Rahmon Qazaqstanǵa resmı saparynda eki eldiń yntymaqtastyǵy barlyq salada qarqyndy ilgerilep kele jatqanyn jetkizdi.
Onyń aıtýynsha, Qazaqstan Tájikstannyń aldyńǵy qatarly saýda jáne ekonomıkalyq seriktesteriniń sanatyna kiredi.
— Bıyl 9 aıdyń qorytyndysy boıynsha elderimiz arasyndaǵy taýar aınalymynyń kólemi 1 mlrd dollardan asty. Bul ótken jyldyń osy kezeńimen salystyrǵanda shamamen 26 paıyzǵa joǵary. Investıtsııalyq yqpaldastyq dáıekti túrde damyp keledi. Búginde Tájikstanda Qazaqstan kapıtalynyń qatysýymen 130-dan asa kásiporyn tirkelgen. Al Qazaqstanda tájik tarapynyń 580-nen astam kásiporny jumys isteıdi. Olardyń 500-i tolyǵymen tájik kapıtalynyń qatysýy arqyly eńbek etedi. Bul — óte jaqsy kórsetkish. Mádenı-gýmanıtarlyq baılanystarymyzda da oń dınamıka saqtalyp otyr. Mádenı, bilim berý jáne akademııalyq is-sharalar turaqty túrde ótkiziledi. Bizdiń qazirgi mindetimiz — strategııalyq seriktestik pen odaqtastyq qarym-qatynasty tyń nátıjelerge ulastyrý. Joǵary deńgeıdegi ýaǵdalastyqtardyń tyńǵylyqty iske asyrylýyna qoldaý kórsetýimiz qajet. Búgingi kelissózimiz barlyq baǵyttaǵy yqpaldastyqty odan ári damytýdyń naqty qadamdaryn aıqyndaıdy, — dedi Emomalı Rahmon.
Kelissóz barysynda saýda-ekonomıkalyq baılanystardy odan ári keńeıtý, kólik-logıstıka, energetıka, aýyl sharýashylyǵy, sý resýrstary, ónerkásip jáne tsıfrlandyrý salalaryndaǵy yqpaldastyq máselelerine nazar aýdaryldy.
Aıta keteıik, 5-7 qarasha kúnderi Memleket basshysynyń shaqyrýymen elimizge Tájikstan Prezıdenti Emomalı Rahmonnyń resmı sapary ótip jatyr.
Buǵan deıin Qasym-Jomart Toqaev barlyq baǵytta oń dınamıka kórsetip kele jatqan qazaq-tájik qarym-qatynasynyń damý deńgeıin joǵary baǵalaǵan edi.
