Qazaqstan men Tájikstan ekonomıkalyq yntymaqtastyqtyń jańa baǵyttaryn aıqyndady
ASTANA. KAZINFORM — Qazaqstan men Tájikstan premer-mınıstrleriniń birinshi orynbasarlary Nurlybek Nálibaev pen Hokım Holıqzoda Dýshanbede Ekonomıkalyq yntymaqtastyq jónindegi úkimetaralyq komıssııanyń 20-shy otyrysyn ótkizdi, dep habarlaıdy Kazinform agenttiginiń menshikti tilshisi is-sharadan.
Taraptar saıası árekettestiktiń turaqty sıpatqa ıe bolyp otyrǵanyn, joǵary jáne eń joǵary deńgeıdegi baılanystardyń úzilmeı kele jatqanyn, bul ekijaqty kún tártibiniń keńeıýine yqpal etip otyrǵanyn atap ótti.
Saýda, ınvestıtsııa, ónerkásip, kólik jáne logıstıka, energetıka, aýyl sharýashylyǵy, bilim berý, densaýlyq saqtaý, ǵylym, mádenıet, týrızm jáne sport salalaryndaǵy yntymaqtastyqtyń bolashaǵy talqylandy.
Qazaqstan — Tájikstannyń negizgi úsh saýda seriginiń biri. 2026 jyldyń qańtarynan qyrkúıegine deıin elder arasyndaǵy saýda aınalymy byltyrǵymen salystyrǵanda 25,6%-ǵa ósip, 1,13 mıllıard dollarǵa jetti. 2025 jyly Tájikstan ekonomıkasyna Qazaqstannan 133,8 mıllıon dollar ınvestıtsııa salyndy, sonyń 14,4 mıllıon dollary tikeleı ınvestıtsııalar.
Taraptar Saýda aınalymyn arttyrý jáne Qazaqstannyń shıkizat emes ónimderin jetkizýdi keńeıtý boıynsha jol kartasyn qabyldaý týraly kelisimge keldi.
Sırek kezdesetin metaldardy óńdeý, qazaqstandyq ınvestorlardyń qatysýymen Tájikstannyń alıýmınıı ónerkásibin jańǵyrtý, bıdaı jetkizilimderiniń turaqtylyǵy jáne 2027 jyly Qazaqstan arqyly munaı ónimderin jeńildikpen tasymaldaý perspektıvaly baǵyttar retinde ataldy.
Tikeleı ınvestıtsııalardy tartýǵa, birlesken kásiporyndar qurýǵa, erkin ekonomıkalyq aımaqtardyń áleýetin paıdalanýǵa jáne aımaqaralyq baılanystardy damytýǵa erekshe nazar aýdaryldy.
Kezdesý qorytyndysy boıynsha taraptar Ekonomıkalyq yntymaqtastyq jónindegi úkimetaralyq komıssııanyń 20-shy otyrysynyń hattamasyna qol qoıdy. Komıssııanyń kelesi otyrysy 2027 jyly Astanada ótedi.
Buǵan deıin Kazinform Qazaqstan kompanııalarynyń Tájikstan naryǵyn ıgerý bolashaǵyna saraptama jasaǵan bolatyn.
Tájikstanda Qazaqstan Respýblıkasy kúni atalyp ótti.
