Qazaqstan men Tájikstan áskerı jáne ekonomıkalyq yntymaqtastyqty keńeıtedi
ASTANA. KAZINFORM – Búgin Senattyń jalpy otyrysynda «Qazaqstan men Tájikstan arasyndaǵy odaqtastyq qatynastar týraly shartty ratıfıkatsııalaý týraly» Zań maquldandy.
Eki eldiń yntymaqtastyǵyn jańa deńgeıge kóterýdi kózdeıtin qujatqa Memleket basshylary Qazaqstan Prezıdentiniń Tájikstanǵa jasaǵan memlekettik sapary aıasynda 2024 jylǵy 22 tamyzda Dýshanbede qol qoıǵan.
- Ózderińizge málim, Tájikstan elimiz úshin mańyzdy ári senimdi strategııalyq seriktes. Memleket basshylarynyń saıası erik-jigeri men túrli platformalarda ózara kezdesýleri ekijaqty yntymaqtastyqty sapaly túrde tereńdetýge serpin berdi. Parlamentaralyq baılanystar aıtarlyqtaı jandana tústi. Jyl saıyn Úkimetaralyq komıssııanyń otyrystary ótkiziledi, óńirler arasyndaǵy baılanystar jolǵa qoıylǵan. Mádenı-gýmanıtarlyq, saýda-ekonomıkalyq yntymaqtastyq júıeli túrde damyp keledi. Eki el arasyndaǵy taýar aınalymy turaqty túrde 1 mlrd dollardan asady. Qazir eki eldiń úkimetteri bul kórsetkishti 2 mlrd dollarǵa deıin ulǵaıtý baǵytynda jumys júrgizip jatyr, - dedi senator Darhan Qydyráli.
26 babtan turatyn Shartta saıası, áskerı, saýda-ekonomıkalyq, aýyl sharýashylyǵy, kólik-tranzıttik, azyq-túlik, ónerkásiptik, sý-energetıkalyq, ekologııalyq, tsıfrlyq, bilim berý jáne mádenı-gýmanıtarlyq salalardaǵy yntymaqtastyqty keńeıtý kózdeledi. Sonymen qatar, bul qujat aıasynda taraptar parlamentaralyq yntymaqtastyqty da odan ári nyǵaıtýdy qoldaıdy.
- Osyndaı shart budan buryn aımaqta kórshiles Ózbekstan jáne Qyrǵyzstan elderimen jasalǵany belgili. Sondyqtan, atalǵan Shart Ortalyq Azııadaǵy yntymaqtastyqty odan ári tereńdete túsedi degen senimdemiz. Shartty ratıfıkatsııalaý – aımaqtaǵy saıası, ekonomıkalyq, gýmanıtarlyq baılanystardy jáne qaýipsizdikti qamtamasyz etý salasyndaǵy ózara is-qımyldy damytý arqyly eki eldiń yrysty yntymaǵyna berik negiz bolady degen oıdamyz. Osyǵan baılanysty Shart elderimizdiń múddelerine tolyq saı keledi dep paıymdaımyz. Tájikstan tarapy ratıfıkatsııa rásimderin aıaqtaǵany týraly 2025 jylǵy 17 qańtarda notalyq tártippen habarlady, - dedi depýtat.
Aıta keteıik, buǵan deıin Qazaqstan men Tájikstan taýar aınalymyn 2 mlrd dollarǵa deıin arttyrýdy josparlap otyrǵanyn jazǵan edik.
