Qazaqstan men Tájikstan arasyndaǵy saýda aınalymy 1,13 mlrd dollarǵa jetti
ASTANA. KAZINFORM — Qazaqstan men Tájikstan arasyndaǵy saýda aınalymy bıylǵy toǵyz aıda 25,6%-ǵa ósip, 1,13 mlrd dollarǵa jetti. Bul másele Dýshanbede ótken eki eldiń ekonomıkalyq yntymaqtastyq jónindegi úkimetaralyq komıssııasynyń otyrysynda qaraldy. Bul týraly Úkimettiń baspasóz qyzmeti málim etti.
Qazaqstan men Tájikstan arasyndaǵy qarym-qatynas barlyq baǵytta qarqyndy damyp keledi. Memleket basshysy Qasym-Jomart Toqaevtyń Tájikstanǵa sapary kezinde seriktestikti nyǵaıtý, saýda-ekonomıkalyq jáne mádenı-gýmanıtarlyq salalardaǵy yntymaqtastyqty tereńdetý týraly kelisimderge qol qoıylǵan bolatyn.
Qazaqstan — Tájikstannyń negizgi úsh saýda seriktesteriniń biri. Jyl basynan beri toǵyz aıda eki el arasyndaǵy saýda aınalymy byltyrǵymen salystyrǵanda 25,6%-ǵa ósip, $1,13 mlrd-qa jetti. Ótken jyly Qazaqstan Tájikstan ekonomıkasyna $133,8 mln ınvestıtsııa saldy, onyń $14,4 mln-y tikeleı ınvestıtsııalar.
Úkimetaralyq komıssııa otyrysynda taraptar saıası qatynastardyń turaqty sıpatqa ıe bolǵanyn, joǵary deńgeıdegi baılanystardyń ekijaqty kún tártibiniń keńeıýine yqpal etkenin atap ótti. Saýda, ınvestıtsııa, ónerkásip, kólik jáne logıstıka, energetıka, aýyl sharýashylyǵy, bilim berý, densaýlyq saqtaý, ǵylym, mádenıet, týrızm jáne sport salalaryndaǵy yntymaqtastyqtyń bolashaǵy talqylandy.
Sondaı-aq saýda aınalymyn arttyrýdyń, Qazaqstannan shıkizat emes ónimderdi jetkizýdi ulǵaıtýdyń Jol kartasyn qabyldaý týraly kelisimge keldi.
Perspektıvaly baǵyttar retinde sırek kezdesetin metaldardy óńdeý, qazaqstandyq ınvestorlardyń qatysýymen Tájikstannyń alıýmınıı ónerkásibin jańǵyrtý, turaqty bıdaı jetkizý jáne 2027 jyly Qazaqstan arqyly munaı ónimderin jeńildikpen tasymaldaý ataldy.
Tikeleı ınvestıtsııalar tartý, birlesken kásiporyndar qurý, erkin ekonomıkalyq aımaqtardyń áleýetin paıdalaný jáne aımaqaralyq baılanystardy damytýǵa basymdyq berý máselesi de jan-jaqty talqylandy.
Kezdesý qorytyndysynda taraptar Ekonomıkalyq yntymaqtastyq jónindegi úkimetaralyq komıssııanyń 20-shy otyrysynyń hattamasyna qol qoıdy. Komıssııanyń kelesi otyrysy 2027 jyly Astanada ótedi.
Eske sala keteıik, buǵan deıin Qazaqstan men Qytaı energetıka salasyndaǵy birlesken jobalardy jedeldetetinin jazdyq.
