Qazaqstan men Tájikstan arasyndaǵy odaqtastyq qatynastar týraly shart ratıfıkatsııalandy
ASTANA. KAZINFORM — Májilis «Qazaqstan Respýblıkasy men Tájikstan Respýblıkasy arasyndaǵy odaqtastyq qatynastar týraly shartty ratıfıkatsııalaý týraly» Zańdy qabyldady.
Syrtqy ister mınıstriniń birinshi orynbasary Erjan Ashyqbaevtyń aıtýynsha, atalǵan shartqa eki eldiń memleket basshylary 2024 jyly 24 tamyzda qol qoıǵan.
— Tájikstan Qazaqstan úshin mańyzdy ári senimdi strategııalyq seriktes sanalady. Eki memleket basshylarynyń saıası erik-jigeriniń arqasynda sońǵy jyldary qazaq-tájik qatynastary jańa deńgeıge kóterildi. Bıik jáne joǵary deńgeıdegi baılanystar turaqty sıpatqa ıe bolyp, Prezıdentterdiń ózara memlekettik saparlary boldy. Sonymen qatar parlamentaralyq baılanystar aıtarlyqtaı jandandy. Jyl saıyn úkimetaralyq komıssııa otyrystary ótkiziledi. Óńirler arasynda da tikeleı baılanystar jolǵa qoıylǵan. Qazaq-tájik strategııalyq áriptestiginiń negizgi trekteriniń biri — saýda-ekonomıkalyq yntymaqtastyq turaqty damyp keledi. Qazaqstan — Tájikstan úshin eń iri saýda seriktesteriniń úshtigine kiretin el. 2021 jyldan beri eki el arasyndaǵy taýar aınalymy turaqty túrde 1 mlrd dollardan asyp keledi. Qazirgi ýaqytta eldiń Úkimetteri bul kórsetkishti 2 mlrd dollarǵa jetkizýdi maqsat tutyp otyr, — dedi ol.
Onyń aıtýynsha, qazirgi ýaqytta eki el arasynda kólik jáne logıstıka, aýyl sharýashylyǵy jáne ónerkásip salalarynda birlesken jobalardy iske asyrý pysyqtalyp jatyr.
— Odaqtastyq qatynastar týraly shart Tájikstanmen qol jetkizilgen ózara is-qımyl deńgeıin quqyqtyq turǵyda bekitip, yntymaqtastyqtyń jańa baǵyttaryn damytý úshin berik saıası-quqyqtyq negiz qalyptastyrady. Geosaıası turaqsyzdyq jaǵdaıynda shart erejelerin iske asyrý óńirlik turaqtylyqty da nyǵaıtýǵa yqpal etedi. Elderimiz arasyndaǵy odaqtastyq qatynastardyń aıqyn dáleli retinde ótken jyly Tájikstannyń HHІ ǵasyrda Ortalyq Azııa damytý maqsatyndaǵy dostyq, tatý kórshilik jáne yntymaqtastyq týraly 5 jaqty shartqa qol qoıýyn atap ótýge bolady. Osylaısha Qazaqstan Ortalyq Azııa memleketteriniń basym bóligimen odaqtastyq qatynastar ornatyp otyr. Bul Qazaqstannyń syrtqy saıasat tujyrymdamasynyń maqsattary men mindetterine saı keledi, — dedi Erjan Ashyqbaev.
Buǵan deıin Qazaqstan Tájikstannyń negizgi saýda seriktesiniń «úshtigine» kirgenin jazǵan edik.
