Qazaqstan men Tájikstan arasyndaǵy AÓK salasyndaǵy taýar aınalymy 595 mln dollarǵa jetti
ASTANA. KAZINFORM — Dýshanbedegi jumys sapary aıasynda Aýyl sharýashylyǵy mınıstri Aıdarbek Saparov Tájikstan Respýblıkasynyń Aýyl sharýashylyǵy mınıstri Kýrbon Hakımzodamen kezdesti.
Kezdesý barysynda taraptar agrarlyq saladaǵy yntymaqtastyqtyń bolashaǵy, azyq-túlik qaýipsizdigin qamtamasyz etý máseleleri jáne eki el arasyndaǵy saýda-ekonomıkalyq baılanystardy damytý baǵyttaryn talqylady.
Aıdarbek Saparov agroónerkásiptik keshen ónimderi boıynsha ekijaqty saýdanyń qarqyndy damyp kele jatqanyn atap ótti. Ótken jyldyń qorytyndysy boıynsha Qazaqstan men Tájikstan arasyndaǵy AÓK ónimderi baǵytynda taýar aınalymy 11,5%-ǵa ósip, 595 mln AQSh dollaryna jetti. Oń úrdis aǵymdaǵy jyly da saqtalýda. Máselen, birinshi toqsanda ózara saýda kólemi 26,1%-ǵa artyp, 182 mln AQSh dollar boldy.
Eksporttyń negizgi úlesi bıdaı, un, ósimdik maıy, arpa, júgeri, et ónimderi jáne ózge de aýyl sharýashylyǵy taýarlaryna tıesili.
Qazaqstan tarapy un tartý ónerkásibi, mal sharýashylyǵy ónimderin qaıta óńdeý, kondıterlik ónimder, ósimdik maıy, tabıǵı shyryndar men kontsentrattar óndirý baǵyttarynda birlesken kásiporyndar qurýǵa jáne Qazaqstan aýmaǵynda Tájikstan ınvestıtsııalaryn tartý arqyly ınvestıtsııalyq yntymaqtastyqty keńeıtýge múddeli ekenin bildirdi.
— Agrarlyq azyq-túlik salasynda ótkiziletin is-sharalar týraly aqparatpen turaqty túrde almasýdy usynamyz. Sondaı-aq selektsııa jáne tuqym sharýashylyǵy salalaryndaǵy yntymaqtastyqty jandandyryp, agrarlyq ǵylym men bilim berý baǵytyndaǵy áriptestikti nyǵaıtý qajet. Onyń ishinde bilim, tájirıbe jáne tehnologııa almasý da mańyzdy ról atqarady. Birlesken bastamalardy iske asyrý elderimizdiń azyq-túlik qaýipsizdigin qamtamasyz etýge jáne aýyl sharýashylyǵy ónimderiniń eksporttyq áleýetin keńeıtýge yqpal etedi, — dedi Aıdarbek Saparov.
Kelissózder barysynda eki eldiń salalyq vedomstvolary ázirlegen aýyl sharýashylyǵy salasyndaǵy yntymaqtastyqty jandandyrýǵa baǵyttalǵan Jol kartasyna erekshe nazar aýdaryldy. Qujatqa qol qoıý aǵymdaǵy jyldyń ekinshi jartysyna josparlanǵan.
Óz kezeginde Kýrbon Hakımzoda Tájikstan tarapynyń Qazaqstanmen áriptestikti odan ári keńeıtýge múddeli ekenin rastap, saýda, aýyl sharýashylyǵy ónimderin qaıta óńdeý, agrarlyq ǵylym jáne zamanaýı tehnologııalardy engizý salalaryndaǵy áriptestik áleýeti joǵary ekenin atap ótti.
Kezdesý qorytyndysy boıynsha taraptar agroónerkásiptik keshendegi yqpaldastyqty odan ári tereńdetýge jáne birlesken jobalardy júzege asyrýǵa daıyn ekendikterin jetkizdi.
Aıta ketelik bıyl fermerlerge 750 mlrd teńge bólinetini týraly jazǵan edik.
