Qazaqstan men Tájikstan arasynda saýda-sattyq kólemi 7 paıyz artty

ASTANA. KAZINFORM – Qazaqstan men Tájikstan arasynda ótken jyly saýda-sattyq kólemi 7 paıyz artyp, 1,2 mlrd dollar boldy. Bul týraly QR Syrtqy ister mınıstri Murat Nurtileý aıtty.

— Tájikstan Qazaqstannyń eń iri saýda seriktesteriniń úshtigine kiredi. Byltyrǵy jyly eki eldiń alys-berisi 7 paıyzǵa artyp, 1,2 mlrd dollar  boldy. Bul qarqyndy arttyrý maqsatynda taıaý arada tıisti jol kartasyn qabyldamaqpyz. Bolashaqta taýar aınalymyn, Memleket basshylarynyń tapsyrmasyna sáıkes, 2 mlrd dollardan asyrýdy josparlap otyrmyz, - dedi ol Tájikstan Respýblıkasynyń Syrtqy ister mınıstri Sırodjıddın Mýhrıddınmen ótken kelissózderden keıingi baspasóz máslıhatynda.

Onyń aıtýynsha, bizdiń elde tájik kásipkerleriniń erkin jumys isteýine barlyq jaǵdaı jasalǵan jáne bizdiń eldiń bıznesmenderiniń de Tájikstandaǵy belsendiligi jyldan jylǵa artyp keledi. Sonyń arqasynda eki jaqta da 100-ge jýyq kásiporyndar men ekijaqty jobalar júzege asyrylyp jatyr. 

Byltyr Tájikstanǵa jetkizilgen bıdaı 24 paıyzǵa, al un 37 paıyzǵa artty. Eksport kólemin odan ary ulǵaıtýǵa daıynbyz, - dep túıdi sózin vedomstvo basshysy.

Aıta keteıik, byltyr Tájikstanǵa bir mıllıon tonnadan astam astyq eksporttaldy.