Qazaqstan men Tájikstan 2025-2027 jyldarǵa arnalǵan ekijaqty taýar aınalymyn ulǵaıtýǵa nıetti
ASTANA. KAZINFORM – 19 shildede Dýshanbe qalasynda Qazaqstan Respýblıkasy men Tájikstan Respýblıkasy Premer-Mınıstrleriniń birinshi orynbasarlary Roman Sklıar men Hokım Holıkzodtyń tóraǵalyǵymen Ekonomıkalyq yntymaqtastyq jónindegi Qazaqstan-Tájikstan úkimetaralyq komıssııasynyń HVIII otyrysy ótti.
Otyrysta eki eldegi ekonomıkalyq jaǵdaı, Qazaqstan men Tájikstan arasyndaǵy saýda-ekonomıkalyq yntymaqtastyqtyń qazirgi jaı-kúıi men damý perspektıvasy talqylandy. Energetıka, ónerkásip, kólik, aýyl sharýashylyǵy, bilim jáne ǵylym, tsıfrlandyrý jáne týrızm salalaryndaǵy ózara is-qımyl máseleleri qaraldy. Ortalyq Azııada sý, energetıka jáne azyq-túlik qaýipsizdigin qamtamasyz etý úshin ózara tıimdi yntymaqtastyqty arttyrý, birlesken kásiporyndar qurý jáne sý-energetıkalyq yntymaqtastyqtyń keshendi tetigin ázirleý jónindegi naqty sharalarǵa erekshe nazar aýdaryldy.
Taraptar Qazaqstan Prezıdenti Qasym-Jomart Toqaevtyń Tájikstanǵa aldaǵy sapary sheńberinde Qazaqstan Respýblıkasy men Tájikstan Respýblıkasy arasyndaǵy taýar aınalymyn ulǵaıtý jónindegi 2025-2027 jyldarǵa arnalǵan Jol kartasyna qol qoıýdy pysyqtaýǵa kelisti.
Roman Sklıar óz sózinde Qazaqstan men Tájikstan arasyndaǵy ózara is-qımyl ekijaqty ekonomıkalyq yntymaqtastyqty damytý úshin úlken perspektıvasy bar áriptestik pen tatý kórshilik rýhynda qarqyndy damyp kele jatqanyn atap ótti. Buǵan ótken jyly 39 kommertsııalyq kelisimshartqa qol qoıylǵan Qazaqstan-Tájikstan bıznes-forýmynyń nátıjesi dálel bola alady.
Roman Sklıar qabyldanǵan sheshimder Qazaqstan-Tájikstan yntymaqtastyǵynyń barlyq baǵyty boıynsha ekijaqty qatynastardy damytýǵa qosymsha serpin beretinine jáne eki el arasyndaǵy baılanysty nyǵaıtatynyna senim bildirdi. Otyrys qorytyndysy boıynsha qol jetkizilgen kelisimderdi iske asyrý týraly hattamaǵa qol qoıyldy.
