Qazaqstan men Tájikstannyń jyldyq saýda aınalymy 1,4 mlrd dollarǵa jetken

ASTANA. QazAqparat – Qazaqstan men Tájikstan arasynda túrli salada 100-den astam kelisimshart jasalǵan. Bul jaıynda Memleket basshysy Qasym-Jomart Toqaev Tájikstan Prezıdenti Emomalı Rahmonovpen Aqordada ótken keńeıtilgen quramdaǵy kelissóz kezinde aıtty, dep habarlaıdy QazAqparat tilshisi.

«Memleketterimiz arasynda barlyq deńgeılerde senimdi saıası dıalog jolǵa qoıylǵan. Biz birqatar halyqaralyq qurylymdar sheńberinde ózara is-qımyl jasap kelemiz. Ortalyq Azııada turaqty damý men qaýipsizdikti qamtamasyz etip otyrmyz. Eki arada ár túrli saladaǵy 100-den astam astam kelisimshartty qamtıtyn salmaqty kelisim-quqyqtyq baza bar. Búgin bul tizim mańyzdyń kelisimdermen tolyǵa túspek», - dedi Prezıdent.

Qasym-Jomart Toqaev Qazaqstan kóptegen jyl boıy Tájikstannyń ekinshi iri saýda seriktesi bolyp kele jatqanyn eske saldy.

«Bizdegi derekter boıynsha, byltyrdyń ózinde ózara saýda kólemi 1 mlrd 400 mln dollar boldy. Ekijaqty kún tártibin ilgeriletýge ekonomıkalyq yntymaqtastyq jónindegi úkimetaralyq komıssııanyń, sondaı-aq taýar aınalymyn ulǵaıtý jónindegi jumys tobynyń qyzmeti eleýli úles qosyp otyr. Olardyń jumysy qazaq-tájik iskerlik keńesin tıimdi tolyqtyrady», - dedi Memleket basshysy.

Buǵan deıin habarlaǵanymyzdaı, Aqordada Qazaqstan Respýblıkasynyń Prezıdenti Qasym-Jomart Toqaev pen Tájikstan Prezıdenti Emomalı Rahmonnyń kezdesýi bastaldy.

Keshe Prezıdent Qasym-Jomart Toqaev Qazaqstanǵa memlekettik saparmen kelgen Tájikstan Prezıdenti Emomalı Rahmondy elorda áýejaıynda qarsy alǵan bolatyn.

Al, 3 mamyrda Qazaqstan-Tájikstan bıznes-forýmynda birqatar mańyzdy qujatqa qol qoıyldy.