Qazaqstan men Tájikstan dıplomatııalyq ǵımarattar úshin jer ýchaskelerin bóledi

ASTANA. QazAqparat -«Qazaqstan Respýblıkasynyń Úkimeti men Tájikstan Respýblıkasynyń Úkimeti arasyndaǵy Dıplomatııalyq ókildikterdiń ǵımarattaryn salý úshin jer ýchaskelerin ózara berý týraly kelisimdi ratıfıkatsııalaý týraly» zań jobasy QR Parlamenti Májilisiniń qaraýyna kelip tústi, dep habarlaıdy QazAqparat.

Búgin Májilistiń jalpy otyrysynda qujat jobasy boıynsha qorytyndy ázirleý mindeti Májilistiń Halyqaralyq ister, qorǵanys jáne qaýipsizdik komıtetine júkteldi.

«Kelisimge sáıkes Qazaqstan men Tájikstan dıplomatııalyq ókildikterdiń ǵımarattaryn salý úshin bir-birine 1 gektar kólemindegi jer ýchaskelerin 49 jylǵa deıingi merzimge sımvolıkalyq jaldaý aqysymen paıdalanýǵa beredi. Kelisim osy máseleniń quqyqtyq negizderin aıqyndaıdy. Komıtet osy zań jobasyn jumysqa alýǵa jáne ol boıynsha qorytyndy ázirleýge daıyn», - dedi Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev.