Qazaqstan men Tájikstan din salasynda birge jumys isteýge ýaǵdalasty

ASTANA. QazAqparat - Tájikstan Prezıdenti Emomalı Rahmonnyń Qazaqstanǵa resmı sapary aıasynda eki eldiń arasynda din salasyndaǵy yntymaqtastyq qujatyna qol qoıyldy, dep habarlaıdy QazAqparat.  

Atap aıtqanda, QR Din isteri jáne azamattyq qoǵam mınıstri Nurlan Ermekbaev pen Tájikstan Úkimeti janyndaǵy Din isteri, ulttyq dástúrler, merekeler men salt-joralardy retteý komıtetiniń tóraǵasy Davlotzada Sýlaımon yntymaqtastyq týraly memorandýmǵa qol qoıdy.

Qujat aıasynda din salasyndaǵy memlekettik saıasatty júrgizý, onyń ishinde dinı ekstremızmniń aldyn alý máseleleri boıynsha tájirıbe almasý qarastyrylǵan. Sondyqtan taraptar ózara qyzyǵýshylyq týdyrǵan taqyryptar turǵysynda kezdesýder men jıyndar uıymdastyrmaq. Naqtyraq aıtqanda, destrýktıvti dinı ıdeologııanyń ári dinı ekstremızm kórinisteriniń taralýyn boldyrmaý maqsatynda túsindirý jumystaryn iske asyrý josparlaýda.

Budan bólek, eki eldiń vedomstvolary birlesken zertteýler júrgizý úshin ǵylymı uıymdar arasyndaǵy yntymaqtastyqty damytýǵa nıet bildirýde.

Qujatta taraptar birlese óz memleketteriniń ulttyq zańnamalary aıasynda din salasyndaǵy yntymaqtastyqty júzege asyratyndyǵy kórsetilgen.