Qazaqstan men Tájikstan bıznesmenderge kómek kórsetetin birlesken kásiporyn qurmaq

ASTANA. QazAqparat – Qazaqstan men Tájikstan saýda-sattyqty damytýda bıznesmenderge járdem kórsetetin birlesken kásiporyn qurmaq. Bul týraly Qazaqstannyń Syrtqy saýda palatasynyń basqarma tóraǵasy Aıan Ershov aıtty, dep habarlaıdy QazAqparat tilshisi.

«2021 jyly saýda mıssııasy barysynda biz 80 mln AQSh dollarynan astam somaǵa bes eksporttyq kelisimge qol qoıdyq. Ótken jyly 100 mln AQSh dollary somasyna alty qujatty rásimdedik. Bıyl da saýda mıssııasyn ótkizemiz. Onda bizdiń nysanaly ındıkatorymyz 120 mln AQSh dollaryn quraıdy», - dedi Aıan Ershov.

Ol Tájikstannyń qarqyndy damyp kele jatqan ekonomıkasy bar el bola otyryp, Qazaqstanmen ásirese munaı-hımııa jáne farmatsevtıka salalarynda yntymaqtastyqty damytýǵa úlken múmkindigi bar ekenin atap ótti.

«Aldyn ala taldaýǵa sáıkes, kásiporyndarymyz Tájikstanǵa 170 mln AQSh dollarynan astam somaǵa shıkizattyq emes eksporttyń qosymsha kólemin ulǵaıta alady. Vıtse-premerler atap ótken eki mıllıard dollar kólemine biz aldaǵy eki jylda jete alamyz dep oılaımyn. Jekelegen jobalardy iske asyrýdan bastap, biz ekonomıkadaǵy júıeli áriptestikke kóshtik. Buǵan búgin qol qoıylǵan bir mıllıard dollardan asatyn kelisimder dálel bola alady. Áriptesterimizben Tájikstanda birlesken kásiporyn qurý týraly tujyrymdamaǵa qol qoıdyq. Bul kásiporyn eki taraptyń bıznesmenderine ózara saýdany damytýǵa, sondaı-aq úshinshi eldermen saýdany damytýǵa járdemdesetin bolady», - dep túıindedi sózin palata tóraǵasy.