Qazaqstan men Tájikstan basshylary sý problemasyn sheshý joldaryn talqylady

ASTANA. QazAqparat - Sý problemasyn sheshýde Tájikstanmen ustanymymyz birdeı. Bul týraly búgin Tájikstan Prezıdenti Emomalı Rahmonmen kelissózderden keıingi birlesken málimdeme jasaý barysynda Elbasy Nursultan Nazarbaev aıtty, dep habarlaıdy QazAqparat.

Sý-energetıka problemasy ár ýaqytta mańyzdy taqyryp boldy. Ámýdarııa men Syrdarııa ózeniniń boıynda 70 mln adam ómir súrip jatyr. Atalǵan adamdardyń ómirleri osy ózendermen baılanysty. Ózara tıimdi yntymaqtastyq, barlyq máselelerdi kelissózder jolymen sheshý - bizdiń barlyq halyqtarymyz úshin óte úlken mánge ıe. Ortalyq Azııanyń transshekaralyq ózenderiniń resýstaryn barlyq halyqtardyń ıgiligi úshin paıdalaný óte mańyzdy. Bul máselede Tájikstanmen birdeı ustanymdamyz», - dedi Nursultan Nazarbaev.

Qazaqstan Prezıdenti osy rette Tájikstan basshysymen sý problemasyn sheshýdiń ózara tıimdi joldaryn qarastyrý qajettiligin talqylaǵanyn aıtty.

«Araldy qutqarý qoryna aıryqsha ról beriledi jáne aǵymdaǵy jyly tóraǵalyq etýshi Túrikmenstan tamyzda forým ótkizbek, bárimiz sol jerde jınalamyz», - dedi Memleket basshysy.

Elbasynyń aıtýynsha, kelissózder barysynda óńirlik jáne jahandyq kún tártibindegi ózekti taqyryptar boıynsha da pikir almasyldy. Aýǵanstandaǵy oqıǵalarǵa baılanysty óńirlik qaýipsizdik máselelerine basa mán berildi.

«Tolyqtaı alǵanda, biz Qazaqstan men Tájikstannyń halyqaralyq arenadaǵy barlyq mańyzdy máseleler boıynsha ustanymy uqsas ekendigin taǵy da qýattadyq», - dedi Elbasy.