Qazaqstan men Tájikstan azamattary eki el aýmaǵynda 30 kúnge deıin tirkeýsiz júre alady
ASTANA. QazAqparat - Qazaqstan azamattary Tájikstanda, tájikstandyqtar qazaq elinde 30 kúnge deıin tirkeýsiz júre alady. Mundaı jeńildik qarastyrylǵan zań jobasy búgin Májilistiń jalpy otyrysynda maquldandy, dep habarlaıdy QazAqparat tilshisi.
Otyrysta «Qazaqstan Respýblıkasynyń Úkimeti men Tájikstan Respýblıkasynyń Úkimeti arasyndaǵy Qazaqstan Respýblıkasy azamattarynyń Tájikstan Respýblıkasynyń aýmaǵynda jáne Tájikstan Respýblıkasy azamattarynyń Qazaqstan Respýblıkasynyń aýmaǵynda bolý tártibi týraly kelisimdi ratıfıkatsııalaý týraly» QR Zańynyń jobasyn QR Іshki ister mınıstri Qalmuhanbet Qasymov tanystyrǵan bolatyn.
Onyń aıtýynsha, kelisimge 2018 jyldyń naýryz aıynda Astanada qol qoıylǵan.
Kelisim eki tarap aýmaǵynda azamattardyń 30 kúnge deıin tirkeýsiz jáne jalpy 90 kún bolýyn kózdeıdi. Kelisimdi ratıfıkatsııalaý taraptardyń aýmaǵynda azamattardyń bolýy máselesin quqyqtyq retteýge múmkindik beredi. 2018 jylǵy shildede kelisimdi Tájikstan Parlamenti ratıfıkatsııalaǵan. Osy zańdy qabyldaý áleýmettik-ekonomıkalyq jáne quqyqtyq teris saldarǵa ákep soqpaıdy», - dedi Qalmuhanbet Qasymov.
Májilis depýtattary zań jobasyn maquldap, Senatqa joldady.
