Qazaqstan men Tájikstan azamattary eki el arasynda 30 kúnge deıin tirkeýsiz júre alady

ASTANA. QazAqparat - Qazaqstan men Tájikstan azamattary bir-biriniń elinde 30 kúnge deıin tirkeýsiz júre alady. Bul týraly búgin Aqordada Qazaqstan Prezıdenti Nursultan Nazarbaevpen kelissózderden keıingi birlesken málimdeme jasaý barysynda Tájikstan basshysy Emomalı Rahmon aıtty, dep habarlaıdy QazAqparat.

«Memleketaralyq qarym-qatynas resmı tulǵalardyń nemese qarapaıym azamattardyń deńgeıi bolsa da adamdar arasyndaǵy baılanysqa negizdeledi. Osy turǵyda taraptar azamattarynyń bir-biriniń aýmaǵynda bolý tártibi týraly kelisimge qol qoıýdyń mańyzdylyǵyn atap ótkim keledi. Endigi ýaqytta bizdiń azamattarymyz bir-birine saparlaǵan kezde tarap aýmaǵynda tirkeýsiz 30 kúnge deıin, al tirkeýmen 90 kúnge deıin bola alady», - dedi Emomalı Rahmon.

Qazaqstan Prezıdenti de búgingi kúni eki eldiń arasynda 80  kelisimshart pen qujatqa qol qoıylyp, aıtarlyqtaı quqyqtyq kelisimshart bazasynyń qalyptasqanyn basa aıtty.

«Búgin sizderdiń aldaryńyzda bizdiń azamattarymyzdyń eki eldiń aýmaǵynda bolý máselelerin quqyqtyq retteýdi qamtamasyz etetin birqatar mańyzdy qujattarǵa qol qoıyldy. Bul qujattar halyqtarymyz ben elimizdi odan ary jaqyndastyra túsýge qosymsha serpin bererine senemin», - degen edi Nursultan Nazarbaev.

Buǵan deıin habarlaǵanymyzdaı , QR Іshki ister mınıstri Qalmuhanbet Qasymov pen Tájikstan Іshki ister mınıstri Ramazon Rahımzoda eki el Úkimetteri arasyndaǵy readmıssııa men ony iske asyrý tártibi, eki el azamattarynyń Qazaqstan men Tájikstan aýmaqtarynda bolý tártibi jáne kóshi-qon salasyndaǵy yntymaqtastyq týraly kelisimderdi rásimdegen bolatyn.

Foto: www.ng.ru