Qazaqstan men Tájikstan áýe kompanııalary reıster sanyn arttyrady
ASTANA. QazAqparat - Qazaqstan men Tájikstannyń áýe kompanııalary eki el arasyndaǵy reısterdiń sanyn arttyrý múmkindigine ıe boldy, Bul jaıynda aqparat QR Indýstrııa jáne ınfraqurylymdyq damý mınıstrliginiń Azamattyq avıatsııa komıtetiniń Feısbýktegi paraqshasynda jarııalandy, dep habarlaıdy QazAqparat tilishisi.
«QR IIDM Azamattyq avıatsııa komıteti sheteldermen áýe qatynasyn keńeıtý boıynsha jumystardy jalǵastyrýda. Memleket basshylarynyń tapsyrýymen Dýshanbede Qazaqstan men Tájikstannyń avıatsııalyq bılik organdary ókilderiniń ekijaqty kelissózderi ótti. Oǵan «Eır Astana», «SCAT», «Tajik Air» jáne «Somon Eır» áýe kompanııalarynyń ókilderi de qatysty. Kelissózder qorytyndysy boıynsha hattamaǵa qol qoıylyp, eki eldiń áýe kompanııalary aptasyna 18-den 32-ge deıin reısterdi, atap aıtqanda, Almaty-Dýshanbe baǵyty boıynsha 12 reıske deıin, Astana-Dýshanbe baǵyty boıynsha aptasyna 6 reıske deıin, budan bólek Astana, Almaty, Shymkent, Taraz jáne Dýshanbe, Hýdjand, Qorǵan-Tóbe, Kýlıab qalalary arasyndaǵy baǵyttar boıynsha aptasyna 14 reıske deıin arttyrýǵa múmkindik aldy», - dep atap ótedi komıtetten.
Vedomstvo málimetinshe, el arasynda aptasyna 32 reıs oryndaýǵa múmkindik beretin quqyqtyq negiz qalandy. Sonymen qatar, eki eldiń bekitilgen áýe kompanııalary ózderi men úshinshi elderdiń áýe tasymaldaýshylary arasynda kommertsııalyq kelisimderdi (kodtardy birigip qoldaný, oryndyqtardy usyný jáne t.b.) jasaýǵa múmkindik aldy.
«Elimiz arqyly tranzıttik jolaýshylar tasymalyn damytý maqsatynda Qazaqstan men Tájikstannyń aımaqtyq áýejaılary arasynda tikeleı áýe reısterin ashý máselesi de qarastyrylýda. Qazirgi ýaqytta qol jetkizilgen kelisimderdiń negizinde qazaqstandyq áýe tasymaldaýshylar 2019 jyldyń kóktemgi-jazǵy navıgatsııadan Astana, Almaty jáne Dýshanbe qalalary arasyndaǵy turaqty reıster sanyn arttyrýdy josparlap otyr», - deıdi Azamattyq avıatsııa komıtetinen.
