Qazaqstan men Tájikstan arasyndaǵy saýda aınalymy $192,9 mln jetti
ASTANA. QazAqparat - Qazaqstannyń Tájikstandaǵy elshisi Nurlan Seıtimov Tájikstan Respýblıkasy Syrtqy ister mınıstriniń orynbasary Mahmadsharıf Mahmýd Hakdodpen kezdesti, dep habarlaıdy «QazAqparat» HAA elshiliktiń baspasóz qyzmetine silteme jasap.
«2017 jyldy 3 mamyry kúni Qazaqstannyń Tájikstandaǵy elshisi Nurlan Seıtimov Tájikstan Respýblıkasy Syrtqy ister mınıstriniń orynbasary Mahmadsharıf Mahmýd Hakdodpen kezdesti. Kezdesý barysynda Nurlan Seıtimov Qazaqstan men Tájikstan arasyndaǵy qarym-qatynastardyń strategııalyq áriptestik negizinde damyp kele jatqandyǵyn qýana habarlady»,-delingen taratylǵan habarlamada.
TR prezıdenti janyndaǵy Statıstıka agenttiginiń málimetteri boıynsha, 2017 jyldyń 1 toqsanynda eki el arasyndaǵy ózara saýda kólemi 2016 jylmen salystyrǵanda 38,3 paıyzǵa artyp, $192,9 mln-dy quraǵan. Sondaı-aq memleketter arasynda mádenı-gýmanıtarlyq baılanystar damyp keledi.
Dýshanbede mamyr aıynda Bilim kúni ótedi, onyń aıasynda qazaqstandyq 30-dan astam JOO-nyń tanystyrylymy ótip, Qazaqstannyń ýnıversıtetterinde bilim alý úshin kvotalardy bólý maqsatynda arnaıy testileý sharalary uıymdastyrylady.
«Kezdesý barysynda Qazaqstan men Tájikstannyń ekijaqty jáne kópjaqty yqpaldastyǵynyń ózekti máseleleri sóz boldy. Sonyń ishinde Azııadaǵy yqpaldastyq jáne ózara senim sharalary jónindegi keńesin Azııadaǵy qaýipsizdik jáne damý uıymyna almastyrý, Tájikstan tarapynan Azyq-túlik qaýipsizdigi jónindegi Islam uıymynyń Jarǵysyn ratıfıkatsııalaý men ózara qyzyǵýshylyq týdyratyn ózge de máseleler sóz boldy»,-dep habarlady baspasóz qyzmeti.
