Qazaqstan men Tájikstan arasyndaǵy saýda aınalymy 18,5%-ǵa artty

ASTANA. QazAqparat - Búgin QR Ulttyq ekonomıka mınıstri Álibek Qýantyrov Tájikstan Respýblıkasynyń Ekonomıkalyq damý jáne saýda mınıstri Zavkı Zavkızodamen kezdesti, dep habarlaıdy QazAqparat QR Ulttyq ekonomıka mınıtsrliginiń baspasóz qyzmetine silteme jasap.

Kezdesý barysynda Á.Qýantyrov Ortalyq Azııa elderiniń ekonomıkalyq forýmyna qatysýǵa shaqyrý alǵany úshin alǵys bildirdi. Atalǵan Forým 14-15 qyrkúıekte Dýshanbe qalasynda Ortalyq Azııa memleketteri basshylarynyń sammıti sheńberinde ótkiziledi.

«Osyndaı Forýmdar elderimizdiń ekonomıkasy men ózara saýdanyń damýyna oń áserin tıgizetin jaqsy dıalog alańy bolatynyna senimdimin. Eki eldiń qarym-qatynasy berik baýyrlastyq baılanystar rýhynda qurylǵan», - dedi Á.Qýantyrov.

Óz kezeginde, Z.Zavkızoda eki el arasyndaǵy ekonomıkalyq qatynastardyń oń ósimin atap ótti.

«Bizdiń ekijaqty qarym-qatynasymyz dostyq pen senimge negizdelgen bıik deńgeıde. Sonyń nátıjesinde, Qazaqstan Tájikstannyń ekinshi eń iri saýda áriptesi bolyp tabylady», - dedi ol.

Taraptar 2023-2024 jyldarǵa arnalǵan Qazaqstan Respýblıkasy men Tájikstan Respýblıkasy arasyndaǵy taýar aınalymyn ulǵaıtý jónindegi Jol kartasyn iske asyrý máselesin talqylaı kele, saýda yntymaqtastyǵyn odan ári nyǵaıtýǵa ýaǵdalasty.

2022 jyly eki el arasyndaǵy taýar aınalymynyń kólemi 1,4 mlrd. AQSh dollaryn qurady. Bul ótken jylǵy uqsas kezeńge qaraǵanda 18,5%-ǵa joǵary.