Qazaqstan men Tájikstan arasyndaǵy áýe reısteriniń sany arttady
«Azamattyq avıatsııa komıteti Nur-Sultan qalasynyń shetel memlekettermen kóliktik baılanysyn keńeıtý boıynsha jumystardy jalǵastyrýda. Búgin elordada Qazaqstan men Tájikstan avıatsııalyq bıliginiń ekijaqty kelissózderi júrgizilip, oǵan «Eır Astana», «SCAT» jáne «Somon Air» áýe kompanııalary qatysty. Kelissózder qorytyndysy boıynsha, ýaǵdalastyqqa qol jetkizilip, eki el kompanııalary Nur-Sultan men Dýshanbe arasynda reıster sanyn arttyrý múmkindigin aldy, ıaǵnı 3-ten 5 reıske deıin. Reısterdiń jalpy sany aptasyna 10-ǵa jetedi. Bul óz kezeginde áýe kompanııalaryna jolaýshylarǵa qolaıly áýe saparyn usynýǵa múmkindik beredi», - delingen QR Azamattyq avıatsııa komıteti málimetinde.
Belgili bolǵandaı, qazirgi ýaqytta eki el arasynda árbir tarapqa aptasyna 18 reıs oryndaýǵa ruqsat etilgen. Atap aıtqanda, «Almaty-Dýshanbe» baǵdarynda aptasyna 6 reıs, «Nur-Sultan-Dýshanbe» 5 reıs, sondaı-aq Nur-Sultan, Almaty, Shymkent, Taraz jáne Dýshanbe, Hýdjand, Kýrgan-Tıýbe, Kýlıab qalalary arasyndaǵy qalǵan baǵdarlar boıynsha aptasyna 7 reıs qamtylǵan.