Qazaqstan men Tájikstan arasynda bıyl júk tasymaly artty

ASTANA. QazAqparat – Bıyl Qazaqstan men Tájikstan arasynda júk tasymaly artyp keledi. Bul týraly elordada ótken bıznes-forýmda QR Indýstrııa jáne ınfraqurylymdyq damý vıtse-mınıstri Dınara Şeglova aıtty, dep habarlaıdy QazAqparat tilshisi.

Mınıstrlik málimetine qaraǵanda, 2022 jyly Qazaqstan men Tájikstan arasynda temirjol arqyly júk tasymaly 3,4 paıyzǵa artyp, 1,9 mln tonnaǵa jetti.

«2023 jyldyń birinshi toqsanynda temirjol kóligimen tranzıttik tasymal kólemi 28 paıyzǵa (570,6 myń tonna) ósti. Sonymen qatar, osy kóliktiń túrimen eksport-ımport kólemi 20 paıyz shamasynda artty», - dedi Dınara Şeglova.

Onyń aıtýynsha, Qazaqstan men Tájikstan yntymaqtastyqty nyǵaıtý maqsatynda avtomobıl jáne temirjol kóligimen tasymaldaýdy damytý qadamdaryn qamtyǵan memorandýmǵa qol qoıýǵa daıyn.

«2022 jyly avtomobıl kóligimen júkterdi eksport ári ımport boıynsha tasymaldaý kólemi 66 paıyzǵa artyp, 289 myń tonnany qurady (2021 jyly – 173,5 myń tonna)», - dedi vıtse-mınıstr.

Budan buryn habarlanǵandaı, búgin Astanada Qazaqstan-Tájikstan bıznes-forýmynda birqatar qujatqa qol qoıyldy.

QR Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın Qazaqstan-Tájistan bıznes-forýmy aıasynda túske deıin bıznesmender arasynda 1 mlrd 300 mln dollardyń kelisimshartyna qol qoıylǵanyn aıtty.