Qazaqstan men Tatarstan taýar aınalymyn 1 mlrd dollarǵa jetkizbek
NUR-SULTAN. QazAqparat – Qazaqstan men Tatarstan taýar aınalymyn 1 mlrd dollarǵa jetkizýdi josparlap otyr. Bul týraly búgin elordada ótip jatqan «Prezıdenttik ınstıtýt: Qazaqstandyq model» atty halyqaralyq parlamenttik konferentsııa aıasynda Tatarstan Memlekettik keńesiniń tóraǵasy Farıd Muhametshın aıtty, dep habarlaıdy QazAqparat tilshisi.
«Nursultan Nazarbaev pen Tatarstannyń birinshi Prezıdenti Shaımıevtiń jeke baılanystary -senim kepili. Al bul keleshekke degen senim. Biz birlesken múddeli kúsh-jigerdiń arqasynda Tatarstan men Qazaqstan arasyndaǵy taýar aınalymynyń kólemin 700 mln dollardan asyra aldyq. Keshe Úkimette Premer-Mınıstrmen jáne Parlament palatalarynyń ókilderimen taýar aınalymyn 1 mlrd dollarǵa deıin jetkizý máselesin talqylap, ózimizge mindet júktedik. Taıaý 2-3 jyldan buǵan qol jetkizýge barlyq múmkinshilik bar», - dedi ol.
Muhametshınniń atap ótýinshe, qazirgi ýaqytta eki eldiń kásiporyndary munaı óńdeý, KamAZ júk kólikteri boıynsha belsendi yntymaqtastyqta jumys istep jatyr. Máselen, aldaǵy ýaqytta Qazaqstanda KamAZ júk kólikteriniń qosalqy bólshekterin shyǵaratyn jańa zaýyt salynbaq.
«Kóptegen jańa baǵyt bar. Biz qazaqstandyq bıznes syndy senimdi seriktestermen barynsha yntymaqtastyqty jolǵa qoıýǵa qajetti munaı hımııasy, farmatsevtıka jáne ózge de baǵyttardy talqyladyq. Biz qytaılyq jáne reseılik tarappen birge Reseı arqyly Eýropaǵa jolaýshylar legi men júk tasymaly júretin Jibek jolynyń tezirek salynýyna múddelimiz. Qazaqstan tarapy jumystyń óz bóligin sátti aıaqtady. Bizde Tatarstan aýmaǵynda jol tóseý jumystaryn júrgúizip jatyrmyz. Taıaý jyldardyń ishinde osynaý tarıhı Jibek joly paıdalanýǵa berilip, elderimizdiń ekonomıkasyna mol úles qosady dep oılaımyn», - dedi Farıd Muhametshın.
