Qazaqstan men Tatarstan birlesken óndirister qurý máselelerin talqylady
NUR-SULTAN. QazAqparat - QR Premer-Mınıstriniń orynbasary Roman Sklıar Tatarstanǵa jumys saparymen bardy, dep habarlaıdy QazAqparat primeminister.kz saıtyna silteme jasap.
Sapar aıasynda QR Premer-Mınıstriniń orynbasary Roman Sklıar Nıjnekamsk jáne Naberejnye Chelny qalalarynda boldy . O nda Qazaqstan Respýblıkasy men Tatarstan Respýblıkasy arasyndaǵy ónerkásiptik kooperatsııa jáne ınvestıtsııalyq yntymaqtastyq máseleleri qaraldy .
Sapar barysynda Roman Sklıar Tatarstan Premer-Mınıstri Alekseı Pesoshınmen jáne «KAMAZ» ÓAQ, «Tatneft» ÓAQ, «Nıjnekamskshına» ÓAQ iri ónerkásiptik jáne qala quraýshy kásiporyndarynyń basshylarymen ekijaqty kezdesýler ótkizdi. Qazaqstan Úkimeti basshysynyń orynbasary óndiristik qýat kózderimen tanysyp, avtomobıl jasaý, munaı-hımııa ónerkásibi, sondaı-aq avtomobıl jáne ónerkásiptik shınalar óndirisi salasynda birlesken óndirister qurý jáne ınvestıtsııalyq jobalardy iske asyrý máselelerin talqylady.
Atap aıtqanda, «Tatneft» ÓAQ men «Allıýr» kompanııalar toby» AQ arasynda Qazaqstan Respýblıkasynda shına óndirisin uıymdastyrý boıynsha jol kartasyna qol qoıyldy. Jobany iske asyrý 1000 jumys ornyn qurýǵa jáne shınalarǵa degen ósip kele jatqan suranysty qanaǵattandyrýǵa, óndiristi oqshaýlaýǵa, kórshi elderge eksporttyq áleýetti damytýǵa múmkindik beredi. Bul rette óndiristik qýaty jeńil tehnıka úshin 3 mln shınany quraıtyndyqtan, ulǵaıtý múmkindigin 3,6 mln shınaǵa deıin arttyrýǵa bolady.
Qazaqstandyq tarap tikeleı sheteldik ınvestıtsııalardy tartý, otandyq ónerkásipti damytý jáne ımportty almastyrý máseleleri QR Úkimeti qyzmetiniń basym baǵyttary bolyp tabylatynyn atap ótti.
Sapar qorytyndysy boıynsha taraptar ekijaqty saýda-ekonomıkalyq jáne ınvestıtsııalyq yntymaqtastyq jobalaryn iske asyrý jónindegi jumysty jandandyrýǵa kelisti.
