Qazaqstan men Taıland yntymaqtastyqty odan ári nyǵaıtpaq — Ermek Kósherbaev
ASTANA. KAZINFORM — Qazaqstan Respýblıkasy Premer-Mınıstriniń orynbasary — Syrtqy ister mınıstri Ermek Kósherbaev Taıland Koroldigi Premer-Mınıstriniń orynbasary, Syrtqy ister mınıstri Sıhasak Pýangketkeomen Táýelsizdik saraıynda ótken ekijaqty kezdesýden keıin kelissózderdiń nátıjeli bolǵanyn málimdedi.
— Keler jyly Qazaqstan men Taıland arasyndaǵy dıplomatııalyq qatynastardyń ornaǵanyna 35 jyl tolady. Taıland Qazaqstan úshin óńirdegi jaqyn ári senimdi seriktes bolyp tabylady. Sońǵy otyz jyldan astam ýaqyt ishinde biz qarqyndy ári jan-jaqty áriptestik ornattyq, — dedi mınıstr.
Onyń aıtýynsha, ekijaqty saýda aınalymy turaqty ósim kórsetip keledi. Ótken jyly bul kórsetkish 255 mıllıon AQSh dollaryna jetken.
— Qazirgi ýaqytta Qazaqstan naryǵynda taı kapıtalynyń qatysýymen qurylǵan 55-ten astam kompanııa tirkelgen. Eki el arasynda kóptegen tikeleı áýe reısteriniń iske qosylýy azamattarymyz ben kásipkerlerimiz arasyndaǵy baılanystardyń damýyna serpin berdi, — dedi Ermek Kósherbaev.
Mınıstr bul faktorlardyń barlyǵy memleketter arasyndaǵy uzaq merzimdi yntymaqtastyqty odan ári nyǵaıtýǵa yqpal etetinine senim bildirdi.
Sondaı-aq ol Qazaqstan men Taılandtyń BUU Jarǵysy men halyqaralyq quqyq qaǵıdattaryn berik qoldaıtynyn jáne kóptegen óńirlik ári jahandyq máseleler boıynsha uqsas ustanymdarǵa ıe ekenin atap ótti.
— Biz BUU jáne onyń mamandandyrylǵan mekemeleri, Azııadaǵy ózara is-qımyl jáne senim sharalary keńesi, Azııa yntymaqtastyǵy dıalogy sekildi kópjaqty alańdar aıasyndaǵy nátıjeli yqpaldastyǵymyzdy jalǵastyryp kelemiz, — dedi mınıstr.
Sonymen qatar Ermek Kósherbaev Qazaqstannyń Taılandtyń Azııa-Tynyq muhıty óńirindegi ornyqty ınnovatsııalar men ekonomıkalyq damýdy ilgeriletýdegi, onyń ishinde BUU-nyń ESKATO sheńberindegi mańyzdy rólin joǵary baǵalaıtynyn atap ótti.
Aıta keteıik, halyqaralyq sý uıymyn qurý ıdeıasy Taılandta usynyldy.
