Qazaqstan men Taıland arasynda áýe reısteriniń sany artady

Bangkok qalasynda Qazaqstan men Taılandtyń avıatsııa bılik organdary kelissóz júrgizdi, dep habarlaıdy Kazinform. 

Qazaqstan delegatsııasyn Azamattyq avıatsııa komıteti tóraǵasynyń orynbasary Tımýr Tlegenov, Taıland Koroldiginiń delegatsııasyn — Taılandtyń azamattyq avıatsııa basqarmasy bas dırektorynyń orynbasary Sarýn Bendjanırat basqardy.

Taraptar áýe qatynasy jóninde jańa úkimetaralyq kelisim jasasý múmkindigin jáne eki el arasyndaǵy áýe tasymalyna suranystyń artýyna baılanysty reıs sanynyń odan ári ulǵaıýyn talqylady.

Kelissóz qorytyndysy boıynsha ózara túsinistik týraly memorandýmǵa qol qoıyldy.

Memorandýmǵa sáıkes ruqsat etilgen reısterdiń jalpy sany — 35,4% (aptasyna 402-den 544-ke deıin), onyń ishinde Astana, Almaty, Qaraǵandy, Shymkent jáne Bangkok, Pýhket, Krabı, Ýtapao qalalary arasynda — aptasyna 84 reıs, al qalǵan sharttyq baǵyttarda — aptasyna 10-ǵa deıin artady.

Qazaqstan men Taıland arasynda reıs sanynyń artýy elder arasyndaǵy týrıstik, mádenı, ınvestıtsııalyq jáne iskerlik yntymaqtastyqty damytýdy jedeldetýge múmkindik beredi.

Aıta keteıik, Taıland Koroldiginiń Úkimeti 25 qyrkúıekten bastap 2024 jylǵy 29 aqpanǵa deıin Qazaqstan azamattary úshin ýaqytsha vızasyz rejım engizdi.

Osylaısha qazaqstandyqtar Taılandta 30 kúnge deıin vızasyz júrip-tura  alady.

Uzaq saparlarǵa tıisti vıza qajet.