Qazaqstan men taǵy tórt elde QR-kod arqyly tólem jasaý múmkindigi engizilýi múmkin
ASTANA. KAZINFORM — Qazaqstan, Qyrǵyzstan, Tájikstan, Ózbekstan jáne Ázerbaıjan azamattary atalǵan elderge sapar shekkende óz bankteriniń mobıldi qosymshalary arqyly QR-kodpen tólem jasap, naqty ýaqyt rejıminde bir-birine aqsha aýdara alady.
22-23 qazanda Tájikstan Respýblıkasynda tólem júıelerin damytý máseleleri boıynsha Qazaqstan, Qyrǵyzstan, Tájikstan, Ózbekstan jáne Ázerbaıjan ortalyq (ulttyq) bankteri ókilderiniń tórtinshi óńirlik kezdesýi ótti.
Іs-sharaǵa qatysýshylar ulttyq tólem platformalary men lezdik tólem júıelerin damytý, QR-kod standarttaryn engizý, qarjylyq ınklıýzııa men qolma-qol aqshasyz tólemderdi keńinen qoldaný, sondaı-aq qashyqtyqtan sáıkestendirýdiń ulttyq júıelerin qurý jóninde tájirıbe almasty.
Qazaqstan Ulttyq banki Ulttyq tsıfrlyq qarjy ınfraqurylymyn (UTsQI) damytýdaǵy jetistikterin tanystyrdy. Atap aıtqanda, Ulttyq tólem júıesin, bıometrııalyq sáıkestendirý platformasyn, tsıfrlyq teńge men ashyq bankıngti, Ulttyq antıfrod-ortalyǵyn jáne telefon nómiri arqyly aqsha aýdarýǵa, sondaı-aq QR-kod arqyly tólem jasaýǵa múmkindik beretin Bankaralyq mobıldi tólemder júıesin iske qosý tájirıbesimen bólisti.
Qatysýshylar transshekaralyq tólemderdi damytý múmkindikterine, sonyń ishinde ulttyq lezdik tólem júıeleri men tsıfrlyq valıýtalardyń ózara jumys isteý joldaryna erekshe nazar aýdardy. Olar QR-tólemderdiń ulttyq júıelerin ıntegratsııalaý jónindegi qazaqstandyq taraptyń usynysyn qoldap, aǵymdaǵy jyldyń sońyna deıin QR-tólemderdiń ulttyq júıeleriniń ózara jumys isteý tetigin naqtylaýǵa kelisti.
Bastama iske asqan jaǵdaıda, Qazaqstan, Qyrǵyzstan, Tájikstan, Ózbekstan jáne Ázerbaıjan azamattary atalǵan elderge sapar shekkende óz bankteriniń mobıldi qosymshalary arqyly QR-kodpen tólem jasap, naqty ýaqyt rejıminde bir-birine aqsha aýdara alady.
Sonymen qatar qazaqstandyq tarap aqparat almasýǵa jáne tsıfrlyq aktıvterdi retteýge qatysty birlesken sharalar ótkizýdi usyndy.
Taraptar tólem júıeleriniń senimdi jumys isteýin qamtamasyz etý, tólem ınfraqurylymyn kıbershabýyldardan qorǵaý, tólem júıelerin qadaǵalaýda jasandy ıntellekt pen SupTech jáne RegTech tehnologııalaryn paıdalaný, sondaı-aq alaıaqtyqqa qarsy kúres máselelerin de talqylady.
Kezdesý sońynda taraptar tólem júıeleri men tsıfrlyq qarjy tehnologııalary salasyndaǵy óńirlik yntymaqtastyqty odan ári damytý múmkindikterine joǵary baǵa berdi.
Aıta ketelik qazaqstandyqtar 11 elde QR-kodpen tólem jasaý múmkindigine ıe bolmaq.
