Qazaqstan men Soltústik Makedonııa Іskerlik keńes qurý týraly kelisimge qol qoıdy
ASTANA. KAZINFORM – QR Saýda jáne ıntegratsııa mınıstri Arman Shaqqalıevtiń Skope qalasyna jumys sapary barysynda Qazaqstan men Soltústik Makedonııa arasynda Іskerlik keńes qurý týraly kelisimge qol qoıyldy.
Sapar Memleket basshysynyń tapsyrmalaryn oryndaý aıasynda, sondaı-aq 2025 jylǵy mamyrda Astana International Forum alańynda Qazaqstan Prezıdenti Qasym-Jomart Toqaev pen Soltústik Makedonııa Prezıdenti Gordana Sılıanovska-Davkova arasynda ótken kelissózderdiń qorytyndysyna sáıkes júzege asyryldy.
Sapar barysynda Soltústik Makedonııa Prezıdenti Gordana Sılıanovska-Davkova Arman Shaqqalıevti qabyldady. Kezdesý kezinde Prezıdentke ekijaqty saýda-ekonomıkalyq yntymaqtastyqtyń qazirgi jaǵdaıy men ony keńeıtý perspektıvalary týraly aqparat usynyldy.
– Biz Qazaqstan men Soltústik Makedonııa arasyndaǵy saýda-ekonomıkalyq yntymaqtastyqty odan ári keńeıtýge jáne jańa baǵyttar boıynsha damytýǵa múddelimiz. Bul sapar ekijaqty baılanystardy naqty mazmunmen tolyqtyrýǵa baǵyttalǵan mańyzdy qadam boldy, – delingen kelissózder qorytyndysynda.
Sondaı-aq Sılıanovska-Davkova 2025 jylǵy mamyrda Astanaǵa jasaǵan saparyn jyly eske alyp, Qazaqstan Prezıdenti Qasym-Jomart Toqaevqa jáne Qazaqstan halqyna izgi tilekterin jetkizdi. Ol memleket basshylarynyń Antalııa dıplomatııalyq forýmy alańynda ótken sońǵy kezdesýin atap ótip, halyqaralyq dıalogty damytý mańyzyn erekshe aıtty.
Sapar aıasynda Arman Shaqqalıev Soltústik Makedonııanyń Syrtqy ister jáne syrtqy saýda mınıstri Tımcho Mýtsýnskımen kelissózder júrgizdi. Taraptar ekijaqty saýdanyń qazirgi jaǵdaıy men damý perspektıvalaryn jan-jaqty talqylap, taýar aınalymynyń turaqty ósýine jaǵdaı jasaý máselesine erekshe nazar aýdardy.
100-den astam makedonııalyq jáne birqatar qazaqstandyq kompanııalardyń qatysýymen ótken bıznes-forým qorytyndysy boıynsha Qazaqstannyń Syrtqy saýda palatasy men Soltústik Makedonııanyń Ekonomıkalyq palatasy arasynda Іskerlik keńes qurý týraly kelisimge qol qoıyldy. Sonymen qatar «QazTrade» saýda saıasatyn damytý ortalyǵy» AQ men Soltústik Makedonııanyń ınvestıtsııalar tartý jáne eksportty ilgeriletý agenttigi arasynda birlesken bıznes-jobalardy iske asyrýǵa baǵyttalǵan yntymaqtastyq týraly memorandým jasaldy.
– Іskerlik keńes qurý eki eldiń bıznes-qoǵamdastyqtary arasyndaǵy baılanysty kúsheıtip, jańa ınvestıtsııalyq jobalardy júzege asyrýǵa múmkindik beredi, – delingen aqparatta.
Bıznes-forým nátıjesinde shamamen 500 mln teńge somasyna kommertsııalyq qujattarǵa qol qoıyldy.
Skopege sapar barysynda mınıstr «Bunardzik» tehnologııalyq jáne ónerkásiptik damý aımaǵynda bolyp, ekologııalyq taza óndiris pen ozyq tehnologııalarǵa mamandandyrylǵan ortalyqtyń jumysymen tanysty.
Sapardyń jalǵasy retinde Stambýl qalasynda iri túrik bıznes ókilderimen kezdesýler ótti. Olardyń qatarynda Orzax Group, Roz Metal jáne Safi Holding kompanııalary bar. Kelissózder barysynda atalǵan kompanııalar Qazaqstandaǵy qatysýyn keńeıtýge, ınvestıtsııalyq jobalardy iske asyrýǵa, óndiristerdi jergiliktendirýge jáne ónerkásiptik kooperatsııany damytýǵa qyzyǵýshylyq bildirdi.
Aıta keteıik, buǵan deıin Soltústik Makedonııa Prezıdenti Qasym-Jomart Toqaevtyń dıplomatııalyq tájirıbesi mol eenin aıtqan bolatyn.
