Qazaqstan men Smithsonian ortalyǵy mádenı mura salasynda áriptestikti keńeıtedi

ASTANA. KAZINFORM – Smıtson ortalyǵynyń halyq shyǵarmashylyǵy jáne mádenı mura jónindegi arnaıy jobalar dırektory Halle Batvın Qazaqstanmen birlesken josparlarymen bólisti.

Halle Batvınniń aıtýynsha, ol Memleket basshysy Qasym-Jomart Toqaevpen Smıtson ınstıtýtynyń jańa bastamasy bolyp sanalatyn Qazaqstannyń mádenı murasy qory jóninde pikirlesken.

Kelesi aıda amerıkalyq qolónershiler tájirıbe almasý aıasynda Almatyda ótetin halyqaralyq qolóner festıvaline qatysady. Aldaǵy ýaqytta kórmeler uıymdastyrý, qazaqstandyq mýzykanttar men ártisterdiń qatysýymen baǵdarlamalar ótkizý josparlanǵan. Bul is-sharalar Smıtson ınstıtýtynyń Azııa óneri ulttyq mýzeıimen áriptestik negizinde júzege aspaq.

Sonymen qatar, Smıtson ınstıtýty men Qazaqstan mýzeı mamandary arasynda tájirıbe almasý baǵdarlamalaryn ázirleý kózdelip otyr.

– Bizdiń jumystarymyzda ártúrli elementter bar, biz olardy zerttep, qarjylandyrý arqyly qorymyzda júzege asyrǵymyz keledi, – dedi Halle Batvın.

Onyń aıtýynsha, atalǵan bastamalardy iske asyrý bir-eki jylǵa sozylýy múmkin, sebebi olar ázirleý kezeńinde tur jáne ýaqytty qajet etedi.

Sondaı-aq ol Smıtson ortalyǵynyń qazaqstandyq mýzykaǵa, óner men mádenıettiń ózge de túrlerine, mýzeılermen áriptestikke qyzyǵýshylyǵy zor ekenin atap ótti.

– Maǵan bul qordyń unaıtyny – ol bizge shyǵarmashylyq turǵyda jumys isteýge jáne Smıtson ınstıtýtynyń túrli bólimderimen qyzyǵýshylyǵymyzǵa baılanysty áriptestik ornatýǵa múmkindik beredi, – dedi Halle Batvın.

Eske sala keteıik, buǵan deıin Memleket basshysy Qasym-Jomart Toqaev Halle Batvınge AQSh-ta qazaq mádenıetin ilgeriletýge qosqan belsendi eńbegi úshin alǵys bildirgen bolatyn.