Qazaqstan men Slovenııa SІM ókilderi ekijaqty yntymaqtastyq máselelerin talqylady
ASTANA. QazAqparat - Astana qalasynda Qazaqstan men Slovenııa syrtqy ister mınıstrlikteri arasynda saıası konsýltatsııalar ótti.
Qazaqstan delegatsııasyn Syrtqy ister mınıstriniń orynbasary - Roman Vasılenko, slovendik tarapty osy eldiń Syrtqy ister mınıstrliginiń Memlekettik hatshysy Darıa Bavdaj Kýret hanym basqardy.
Kelissózder barysynda, 2017 jylǵy qyrkúıekte 25 jyldyǵy toılanatyn eki memleket arasyndaǵy dıplomatııalyq qarym-qatynastar ornatylǵannan bergi seriktestiktiń barlyq spektory talqylandy.
Atap aıtqanda, saýda-ekonomıka, densaýlyq saqtaý, farmatsevtıka, saýyqtyrý medıtsınasy, ınnovatsııa jáne joǵary tehnologııa, IT, kólik ınfraqurylymy, týrızm, sondaı-aq ekijaqty yntymaqtastyqtyń shart-quqyqtyq bazasyn keńeıtý salalaryndaǵy máseleler kóterildi.
Sonymen qatar, Eýropalyq odaq, Qazaqstannyń 2017-2018 jyldary BUU Qaýipsizdik Keńesindegi músheliginiń basymdyqtary, sloven joǵary ókilderi men kompanııalarynyń EKSPO-2017 Halyqaralyq mamandyrylǵan kórmesine qatysýy jáne t.b. óńirlik jáne halyqaralyq kún tártibiniń ózekti máseleleri jóninde pikir almasyldy.
Sonymen qatar, D. Bavdaj Kýretti Astanaǵa sapary barysynda Qazaqstannyń Syrtqy ister mınıstri Qaırat Ábdirahmanov jáne QR Parlamenti Májilisi Halyqaralyq ister, qorǵanys jáne qaýipsizdik komıtetiniń Tóraǵasy M. Áshimbaev qabyldady.
