Qazaqstan men Slovenııa qazaqstandyq medıtsına qyzmetkerleriniń biliktiligin arttyrý máselelerin talqylady

ASTANA. QazAqparat - Lıýblıana qalasynda QR densaýlyq saqtaý jáne áleýmettik damý vıtse-mınıstri Eljan Birtanov pen Slovenııa syrtqy ister mınıstrliginiń memlekettik hatshysy Sanı Shtıglıtstiń tóraǵalyǵymen Qazaqstan-Slovenııa saýda-ekonomıkalyq yntymaqtastyq jónindegi úkimetaralyq komıssııasynyń 3-shi otyrysy ótti, dep habarlaıdy primeminister.kz.

Otyrys barysynda eki eldiń ókilderi medıtsına, qurylys, týrızm, tamaq pen aýyr ónerkásip jáne t.b. salalardaǵy qazaqstandyq jáne slovenııalyq kompanııalardyń saýda-ekonomıkalyq yntymaqtastyǵynyń qazirgi jaǵdaıy men damý keleshegin talqylap, ekijaqty qarym-qatynasty keńeıtý jóninde pikir almasty. 

QR DSÁDM habarlaýynsha, taraptar qazaqstandyq medıtsına kadrlarynyń biliktiligin arttyrý, aýrýlardy dıagnostıkalaý men emdeý, medıtsınalyq týrızm, densaýlyq saqtaý salasyndaǵy memlekettik-jekemenshik seriktestikti jáne t.b. damytý másleleri boıynsha yntymaqtastyqty jetildirýge kelisti. 

Jıyn sońynda komıssııanyń teń tóraǵalary ekijaqty tıimdi yntymaqtastyqty ári qaraı jalǵastyrý jónindegi hattamaǵa qol qoıdy.