Qazaqstan men Slovakııa jahandyq teketirester men saýda soǵysy beıbit jolmen sheshilýi kerek dep sanaıdy
ASTANA. KAZINFORM – Qazaqstan men Slovakııa jahandyq teketirester men saýda soǵysy beıbit jolmen sheshilýi kerek dep sanaıdy. Bul týraly Slovakııa Premer-mınıstri Robert Fıtsomen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty.
- Bizdiń qarym-qatynasymyzdyń tarıhy tereń. Qazaq jaýyngerleri ekinshi dúnıejúzilik soǵys kezinde Slovakııany azat etýge belsene atsalysty. Osyǵan oraı Robert Fıtso myrza búgin Otan qorǵaýshylar monýmentine baryp, batyrlardyń rýhyna taǵzym etti. Osylaısha adamzat úshin qıyn kezeńde bastaý alǵan qazaq-slovak dostyǵy búginge deıin jalǵasyp, nyǵaıyp keledi, - dedi Prezıdent.
Memleket basshysy kelissóz barysynda halyqaralyq jáne aımaqtyq máselerge de nazar aýdarylǵanyn aıtty.
- Álemdegi geosaıası ahýal, jahandyq teketirester men saýda soǵysy bárimizdi alańdatyp otyr. Eki tarap ta bul túıtkilder beıbit jolmen sheshilýi kerek dep sanaıdy. Elderimizdiń halyqaralyq uıymdar aıasyndaǵy baılanysy nyǵaıyp keledi. Atap aıtqanda, dostyǵymyz BUU, EQYU sııaqty qurylymdar aıasynda damyp jatyr. Kóptegen jahandyq úrdister men syn-qaterlerge qatysty ustanymdarymyz uqsas. Biz kópjaqty dıplomatııalyq baılanystardy tereńdetýge erekshe mán beremiz. Búgingi kelissóz qarym-qatynasymyzdyń ózara tıimdi sıpatyn taǵy da naqtylaı tústi. Birlesken kúsh-jigerimizdiń arqasynda qazaq-slovak yqpaldastyǵy jańa deńgeıge kóteriledi dep senemin, - dedi Qasym-Jomart Toqaev.
Buǵan deıin Memleket basshysy Qasym-Jomart Toqaev Slovakııa Premer-mınıstri Robert Fıtsomen shaǵyn quramda kelissóz júrgizgenin jazǵan edik.
Al keńeıtilgen quramdaǵy kelissóz barysynda Memleket basshysy Slovakııa Qazaqstannyń Eýropalyq odaqtaǵy mańyzdy ári senimdi seriktesi ekenin aıtty.