Qazaqstan men Slovakııa ınvestıtsııalardy ózara kótermeleıtin bolady
ASTANA. QazAqparat - Búgin Senattyń Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysy ótti. Onda «Qazaqstan Respýblıkasynyń Úkimeti men Slovak Respýblıkasynyń Úkimeti arasyndaǵy Investıtsııalardy kótermeleý jáne ózara qorǵaý týraly kelisimdi ratıfıkatsııalaý týraly» zań jobasy talqylandy
Atalǵan Kelisimge2007 jylǵy 21 qarashada Bratıslava qalasynda, Qazaqstan Respýblıkasynyń Prezıdenti N. Nazarbaevtyń Slovak Respýblıkasyna resmı sapary barysynda qol qoıylǵan.
Kelisim Qazaqstan men Slovakııa arasyndaǵy qarym-qatynastardyń damýyna serpin beredi. Bul rette eki eldiń ózara ınvestıtsııalaryn yntalandyrýǵa úlken múmkindikter qarastyrylyp, ózara tıimdi saýda-ekonomıkalyq yntymaqtastyqty odan ári damytýǵa jol ashylady.
Zań jobasy Qazaqstan Respýblıkasynyń qoldanystaǵy ınvestıtsııalyq zańnamasynda kózdelgendegiden ózge qaǵıdalardy belgileıtin birqatar erejelerdi qamtyp otyr. Máselen, Kelisimniń 5-babynda ınvestorǵa onyń ınvestıtsııalaryn eksproprıatsııalaǵan jáne memleket menshigine alǵan kezde ótemaqy tóleý kózdelgen. Sondaı-aq Kelisim taraptardyń arasyndaǵy daýlardy sheshý maqsatynda uıymdastyrylatyn, halyqaralyq tórelik sotyn qalyptastyrý rásimderin egjeı-tegjeıli reglamentteıtin erejelerdi qamtıdy.
Kelisim ony aldaǵy ýaqytta uzartý múmkindigimen 10 jyl merzimge jasaldy. Zań jobasy aldaǵy ýaqytta ótetin palatanyń jalpy otyrysyna shyǵarylmaq.
