Qazaqstan men Sıngapýrdyń saýda-ekonomıkalyq yntymaqtastyǵy talqylandy

ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev Sıngapýrdyń Qazaqstandaǵy rezıdent emes elshisi Zýlkıflı Baharýdınmen kezdesti. Bul týraly primeminister.kz habarlandy.

Kezdesý barysynda jasyl ekonomıkany, bıznesti, logıstıkany jáne qarjy júıesin damytý salalaryndaǵy saýda-ekonomıkalyq jáne ınvestıtsııalyq yntymaqtastyqty keńeıtý máseleleri talqylandy. Qazaqstan men Sıngapýr arasynda 25 jyl ishinde barlyq baǵyttar boıynsha syndarly dıalog ornaǵan, ekijaqty qarym-qatynasty damytýda jáne halyqaralyq uıymdar aıasynda ózara is-qımyl jasaýda oń úrdis qalyptasqan.

Sondaı-aq, kezdesýge qatysýshylar sot júıesine tsıfrlyq tehnologııalardy engizý jáne Smart City jobalaryn iske asyrýdaǵy tabystylyq týraly tájirıbe almasty.

B. Saǵyntaev Qazaqstan Sıngapýrdy Ońtústik-Shyǵys Azııa men ASEAN aımaǵyndaǵy negizgi seriktes retinde qarastyratynyn atap ótti. Sıngapýrdyń saýda jáne qarjy, kólik-logıstıkalyq hab retindegi jalpyǵa tanylǵan bedelin eskere otyryp, saýda-ekonomıkalyq jáne ınvestıtsııalyq yntymaqtastyqty keńeıtý ekijaqty qarym-qatynastyń basym salasy bolyp qala bermek.

Premer-Mınıstr ótken jyly $123,7 mln quraǵan ekijaqty taýar aınalymynyń dınamıkasyndaǵy oń ózgeristerdi atap ótti. Sońǵy ýaqytta ekijaqty qarym-qatynas aıtarlyqtaı jandana tústi. Budan ózge, qazaqstandyq naryqta sıngapýrlyq ınvestorlar úshin Eýrazııalyq ekonomıkalyq odaq jańa múmkindikter ashýda. Qazaqstan Sıngapýrdyń EAEO-men erkin saýda týraly kelisim jasasý jónindegi bastamasyn qoldaıdy.

Sonymen qatar, qazirgi tańda Qazaqstannyń birjaqty tártipte Sıngapýr azamattaryna vızalyq rejimdi 30 kúnge deıin alyp tastaýyna baılanysty iskerlik baılanystar keńeıip jatqany baıqalýda.

2016 jyly ózara saýda-sattyq $91,4 mln qurady. Eki el arasyndaǵy taýar aınalymy ótken jyly $123,7 mln qurady, sonyń ishinde eksport - $86,5 mln. 2018 jyldyń І toqsanyndaǵy taýar aınalymy $28,1 mln boldy.